5 GÜNDƏN SONRA BAŞLAYIRIQ

“Qarabağ” komandasının XVII Azərbaycan milli çempioatının hazırlıqlarına başlamasına sadəcə 5 gün qaldı. Artıq İyunun 18-i futbolçularımız klubun bazasına yığışacaq. İyunun 19-u  saat 17:00-da isə  yeni mövsümün ilk hazırlığına start veriləcək. Nəzərinizə çatdıraq ki, komandanın müqaviləsi olan legionerləri Viktor İgbekoyi və Mamadouba Soumah düşərgəyə bir qədər gec qoşulacaq.  Bakıdakı 10  günlük hazırlıq dönəminə baş məşqçi Rasim Kara başçılıq edəcək. Baş məşqçimiz ayın 18-i Bakıya dönəcək. Onu da qeyd edək ki, əsasən fiziki hazırlığa  əsaslanan dönəmdə komandamız Bakıda yoxlama oyunu keçirməyi planlaşdırmır. Taktiki çalışmalar iyulun 1-ində Türkiyənin Qızılcahamam bölgəsində başlayacaq kamp müddətində keçiriləcək.

Komandamızın fiziki hazırlıq üzrə koordinatoru Mehmet Ak isə Bakıya gec dönəcək. Daha doğrusu, 18-i paytaxtımızda olması planlaşdırılsa da Mehmet bəy Türkiyənin Ankara şəhərində keçiriləcək seminarlara qatılacağından komandaya Qızılcahamamda qoşulacaq.

Komandamıza yeni qoşulacaq futbolçulara gəlincə. “Qarabağ”ın yeni transferləri Türkiyə kampında müəyyən olunacaq. Baxışa gələn futbolçuların keçiriləcək yoldaşlıq oyunlarında taleyinə aydınlıq gələcək.