AFFA "Xəzər-Lənkəran"ı 26 min manat cərimələdi
31 Okt 2007
AFFA "Xəzər-Lənkəran"ı 26 min manat cərimələdi
AFFA-nın Nizam-İntizam Komitəsi toplantısında belə qərar verilib. Milli çempionatın "Xəzər-Lənkəran" - "Standard-Bakı" oyununda Lənkəran komandasının 4 oyunçusu sarı vərəqə ilə cəzalandırıldığına görə klub 1000 manat məbləğində cərimə olunub. Qarşılaşmanın 2-ci hissəsində meydançaya azarkeşlər tərəfindən kənar əşyalar atıldığına görə meydan sahibi 2000 manat xərcə düşüb. Matç ərzində stadionda kütləvi nizam-intizamsızlıq müşahidə olunduğundan baş vermiş hadisənin dərəcəsindən və xarakterindən asılı olaraq "Xəzər-Lənkəran"ın 3 ev oyununun azarkeşsiz keçirməsinə və komandanın 8000 manat cərimələnməsinə qərar verilib. Hakimlər briqadasının AFFA-nın Nizam-İntizam Komitəsinə yazdıqları raporta əsasən onların 1-ci hissə bitdikdən sonra Lənkəran klubunun rəsmi nümayəndəsi Vüsal Cəlilov meydana girərək digərlərini də ədavətə və qəddarlığa sövq edərək təhqir etdiyinə görə, həmin şəxs 12 aylıq yarışlardan kənarlaşdırılıb və komanda 15000 manat məbləğində cərimələnib. Bunlardan əlavə, Bakıya qayıdarkən Masallı istiqamətində dövlət nişanı olmayan "BMW" markalı avtomobildə olan şəxslər tərəfindən hakimləri kənara çəkib saxlayaraq təhqir etdiklərinə və yuxarıda qeyd olunanlara görə Daxili İşlər Nazirliyinə, həmçinin bir nüsxəsi Gənclər və İdman Nazirliyinə məktub göndərilməsi haqda qərar çıxarılıb. Həmçinin bu oyuna ezam olunan hakimlər briqadasının bu oyunu idarəçilik məsələsi Hakimlər Komitəsinə həvalə edilib.NİK-in digər qərarına əsasən, "Qarabağ" - "İnter" oyununda 4 oyunçusu sarı vərəqə ilə cəzalandırıldığına görə hər iki klub 1000 manat xərcə düşüb. "Karvan" - "Bakı" qarşılaşmasında paytaxt komandasının 4 üzvü sarı vərəqə ilə cəzalandırıldığı üçün klub 1000 manat AFFA-nın hesabına köçürməli olacaq. "Neftçi" - "Simurq" oyununun 61-ci dəqiqəsində Zaqatala komandasının oyunçusu Ramin Hacıyev ikinci xəbərdarlığa görə, meydandan qovulduğu üçün 1 oyunluq kənarlaşdırılıb və klub 200 manat cərimələnib