AKTİVƏ NÖVBƏTİ ÜÇ XAL . . .

"QARABAĞ" 2 -1 "MOİK" Oyun gözlənildiyi kimi, meydan sahiblərinin hücumları ilə başladı və 3-cü dəqiqədə ilk təhlükəli vəziyyət yarandı.Lakin Müşviq Hüseynovun zərbəsini qapıçı tuta bildi. Az sonra Qoqa Berayanın ötürməsindən sonra Samir dəqiq zərbə ilə hücumu tamamlaya bilmədi. 14-cü dəqiqədə isə hesab açıldı. Samir Musyevin yandan iki müdafiəçini arxada qoyduqdan sonra ötürməsini Vasif Haqverdiyev tamamladı- 1:0. Bundan sonra hesab arasındakı fərqi artırmaq üçün irəli atılan meydan sahiblərini 32-ci dəqiqədə gözlənilmədən qonaqlar məyus etdilər. Sürətli əks hücum qolla nəticələndi."Soyuq duş" "Qarabağ"lıları ayıltdı və meydana mərkəzdən başlayan kimi hesabı yenidən öz xeyirlərinə dəyişdilər.Topu Müşviq Hüseynov rəqib qapısından keçirdi. Bundan sonra da "Qarabağ" daim hücumda olsa da ilk hissə elə bu hesabla da başa çatdı. İkinci hissədə "Qarabağ" oyunçuları vacib kubok oyunu öncəsi zədə almamaq topu saxlayaraq uzaq zərbələr və yan asmalardan istifadə etməyə başladı. Buna baxmayaraq, dəfələrlə Elmir Xankişiyev, Müşviq Hüseynov 100 faizlik qol imkanından istifadə edə bilmədilər. Üç dəfə hücumçumuz qapıçı ilə üzbəüz qalsa da hər dəfə qapıçı Anar Bayramov qalib ayrıldı. Belədə oyun "Qarabağ"ın minimal hesablı qələbəsi ilə başa çatdı və komanda mühüm üç xalı aktivinə yazaraq turnir cədvəlindəki yerini bir qədər də möhkəmləndirdi.