ALLAH RƏHMƏT ELƏSİN !

“Qarabağ” Futbol Klubunun kollektivi böyük hüzn içindədir. Komandanın yaradıcılarından biri, uzun illər onu öz çiyinlərində daşımış, son illərdə isə Klubun rəisi kimi fəaliyyət göstərən Ramiz Şahməmmədov ömrünün qürub çağında vəfat etmişdir. Hələ gənc yaşlarından bütün həyatını futbola həsr eləmək qərarı vermiş Ramiz dayı qısa zaman kəsiyində yerli gənclərdən ibarət, güclü rəqiblərə qarşı layiqli müqavimət göstərən bir komanda yaratdı. Bunun bəhrəsi isə müstəqillik dönəmindən sonra daha qabarıq şəkildə göründü. Artıq müstəqillliyin 2-ci ilində “Qarabağ” Futbol Klubu Azərbaycan Çempionu və kubokunun sahibinə çevrildi.... Son nəfəsinə qədər “Qarabağ”ın uğurları üçün hər bir şeyini qurban verməyə hazır olan Ramiz dayı ömrünün son günlərini də komanda arasında keçirdi. Ən son nailiyyətini isə kuboku başı üzərinə qaldırmaqla qazandı. Hələ final oyunu öncəsi komandanın toplantısında öz çıxışı ilə futbolçulara əlavə stimul verən Ramiz dayı sevimli komandasının qələbəsinə ən çox sevinənlərdən biri oldu... ...İndi komandamızda başqa Ramiz Şahməmmədov böyüyür. Babasının yolunu davam etdirən balaca Ramiz “Qarabağ”ın gənclərdən ibarət komandasında böyük istəklə və iri addımlarla irəliləyir. Onun perspektivinə inanan məşqçilər isə gələcəkdə dahi insanın nəvəsinin uğuru üçün çalışır. Ramiz Şahməmmədov isə babasının layiqli davamçısı olacağına şübhə etmir... ..Mərhumu son mənzilə yola salma mərasimində də komandanın Vitse Prezidenti Taher Gözel, Klubun Direktoru Emrah Çelikel və digər klub üzvləri iştirak etdilər. Ramiz dayı haqqında yalnız xoş sözlər deyən hər bir məclis üzvü ona allahdan rəhmət dilədi, mərhumun ailəsinə, onun yaxınlarına allahdan səbr dilədilər. Allah Rəhmət eləsin!