"ARSENAL" BIABIR OLDU
24 Yan 2008
"ARSENAL" BIABIR OLDU
"Emirates Stadium"da keçirilən ilk oyunda heç-heçə edən komandaların cavab görüşündə 5:1 hesabının qeydə alınacağını heç kim gözləmirdi. Xuande Ramosun komandası artıq 3-cü dəqiqədə hesabı açmağa nail oldu. Berbatovdan ötürmə alan Cenas cərimə meydançası yaxınlığında vurduğu qüvvətli zərbə ilə topu "Arsenal"ın qapısından keçirdi. "Tottenhem"in 27-ci dəqiqədə təşkil etdiyi hücum da qolla nəticələndi. Bu dəfə Cenasın cərimə meydançasına ötürdüyü topu uzaqlaşdırmaq istəyən "Arsenal"lı Bendtner avtoqola imza atdı. Fasilə ərafəsində meydan sahibləri 3-cü qolu da vura bilərdilər. Amma bu dəfə Berbatovun zərbəsindən sonra qapı dirəyi "topçular"ın köməyinə çatdı. İkinci hissəyə hücumlarla başlayan "Tottenhem" 48-ci dəqiqədə rəqibini yenidən meydanın mərkəzinə dəvət etdi. Berbatovun uzun ötürməsindən sonra Robbi Kin "Arsenal"ın qapıçısı Fabyanskini məyus etdi. 60-cı dəqiqədə isə Lennon hesabdakı fərqi dörd topa çatdırdı. 10 dəqiqə sonra "Arsenal" Adebayorun ifasında buraxılan qollardan birinin əvəzini çıxsa da, "Tottenhem"li Malbrank yekun hesabı müəyyən etdi.