ASLAN KƏRİMOV MƏŞQÇİ OLDU (FUTBOL+QOL, 26.11.2005)

"Qarabağ" və milli komandanın üzvü Aslan Kərimov bundan sonra klubunun şərəfini qorumaqla yanaşı, həm də komandasının uşaqlardan ibarət heyətinin seleksiyaçı-məşqçisi kimi fəaliyyət göstərəcək. Artıq Ağdam təmsilçisinin İcraçı Direktoru Əmrah Çəlikəl 5 qat Azərbaycan Çempionuna məşqçilik lisenziyasını təqdim edib. Bu münasibətlə futbolçu klubunun rəsmi saytına qısa müsahibə verib:"Mənə etimad göstərib, bu vəzifəni mənə həvalə etdiklərinə görə, Komandanın Prezidenti başda olmaqla bütün idarə heyətinə öz dərin təşəkkürümü bildirirəm. Mən karyeramı başa vurduqdan sonra, məşqçilik etməyi, illər ərzində əldə etdiyim az-çox təcrübəni gənclərə ötürməyi fikirləşirdim. Bu təklif mənim üçün həm sürpriz,gözlənilməz olduğu qədər , həm də arzumun çin olması baxımından lap yerinə düşdü. Əlbətdə ki, sevinirəm. "Qarabağ" komandasının gələcəyinin inşasında mənə də yer verildiyi üçün hədsiz dərəcədə minnətdaram. Mən indi futbol oynayıram. Futbolu atmağı düşünmürəm. Amma futbolçu karyeramı davam etdirərək, həm də məşqçilik kurslarında bu peşənin sirlərini öyrənəcəm.Yaxın günlərdə Avropanın "B" səviyyəli diplomları üzrə UEFA tərəfindən kurslar təşkil olunacaq. Bu kurslarda yüksək dəstə komandalarından məşqçilər iştirak edəcək. "Qarabağ" Futbol Klubundan mənim bu kurslarda iştirakım məqsədəuyğun sayıldı. Mən böyük şərəf hissi keçirirəm ki, məşqçi kimi "Qarabağ"ı təmsil edəcəm."