Aslan Kərimov "Qarabağ"dan gedəcək, Sonradan məşqçi kimi qayıtmaq üçün(FUTBOL+,10.12.2005)

"Qarabağ" rəhbərliyi yaxınlarda komandanın veteran futbolçusu Aslan Kərimova yeni post tapşırdı. Nə qədər gözlənilməz səslənsə də, millimizin oyunçusu bundan sonra Ağdam klubuna məşqçi kimi xidmət edəcək. Daha doğrusu, indi yox, futbolçu karyerasını bitirəndən sonra. Görünür, "Qarabağ"ın başbilənləri uzun illər boyunca komandaya xidmət etdiyinə görə Kərimova məhz bu cür - əlinə yeni sənət verməklə minnətdarlıq etmək fikrindədi. Elə klubun icraçı direktoru Əmrah Çəlikəl də bu məqamı önə çəkməklə bu işlərin gələcək üçün planlaşdırıldığını da bildirdi: "Aslan "Qarabağ"ın ən sadiq oyunçularındandır. Onu sıralarımızda saxlamaq üçün Kərimova uşaq komandalarıyla işləyən məşqçi-seleksiyaçı vəzifəsini tapşırmaq qərarına gəldik. Düzdü, o hələ oyunçu kimi klubumuza xidmət edir. Amma karyerasını başa vurandan sonra yeni işiylə məşğul ola bilər. Yəni bunu gələcək üçün planlaşdırmışıq. Rəsmi müqaviləmiz var. Artıq ayın sonundan kurslarda iştirak etməyə başlayacaq. Aslanın səviyyəli mütəxəssis kimi yetişməsi üçün əlimizdən gələni edəcəyik, növbəti illərdə onu xaricə, məşqçi kurslarına göndərməyi də düşünürük. İndi o futbolçudu. Sabah başqa kluba keçsə də, problem olmaz. Onunla elə münasibətimiz var ki, futbolçu özü və rəhbərlik məsləhət görərsə, digər komandalara transferinə problem yaratmayacağıq. Bu amil Kərimovun gələcəkdə bizə məşqçi kimi xidmət etməsinə də mane olmaz". Aslanın özünün də bu məsləyə münasibətini öyrəndik. O hələ ki futbolçu karyerasını bitirmək fikrində olmadığını dilə gətirdi: "Bu dəqiqə "Qarabağ"da konkret vəzifəm futbol oynamaqdı. Karyeramı bitirməyi hələ ki düşünmürəm. Bildiyiniz kimi, rəhbərlik məşqçilik barədə mənə təklif edib. Ortada rəsmi bir şey yoxdu. Düzdü, məşqçi-seleksiyaçı ştatı açılıb. Mənə də burda işləmək təklif olunub. Amma onlara dedim ki, yalnız təhsil alandan, təcrübə toplayandan sonra gəlib işləyərəm. Hələlik bu haqda bir şey deyə bilmərəm. Rəhbərliklə aramızda belə söhbət var ki, başqa kluba keçsəm də, karyeramı bitirəndən sonra gəlib "Qarabağ"da işləyəcəm. Mənim sənətim budu. Futbolu buraxdıqdan sonra da pul qazanmaq üçün məşqçi işləməyə məcburam. Özümün də həvəsim var. İyirmi ildi oynayıram. Ustalıq səviyyəm ola bilər ki, çox yüksək deyil. Hər halda, müəyyən təcrübə qazanmışam. İstəyirəm təcrübəmi gənclərlə də bölüşüm. Klub rəhbərliyi təhsil almaq üçün şərait yaratmağa söz verib. Yaxınlarda Bakıda məşqçilik kursu açılacaq. Orda iştirak edəcəm. Gələcəkdə Almaniya, Türkiyə və başqa ölkələrə də yollana bilərəm". Hələ yaydan adı bir neçə elita təmsilçisiylə yanaşı hallanan Aslan Kərimov deyəsən, komandasını dəyişmək fikrinə düşüb. Belə ki, təcrübəli futbolçu "Karvan" və "MKT-Araz" daxil olmaqla bir neçə klubun hədəfindədi. Hətta imişlilərin Aslanla müqavilə bağlamaq ərəfəsində olduğu da deyilir. "Karvan" məsələsi də maraqlıdı. Yadınızdadısa, mövsümlərarası fasilədə Kərimovun Yevlax klubuna keçidi gündəmdə idi. Hətta o zaman yarımmüdafiəçi bir aya yaxın komandanın düşərgəsində olmuşdu. Amma sonradan Aslanın "Qarabağ"la müqaviləsinin qaldığı ortaya çıxdı və ağdamlıların təkidindən sonra futbolçu sabiq komandasına dönməli oldu. Müdafiəçi bu məsələyə aydınlıq gətirməklə yanaşı, digər komandalardan təklif aldığını nə təkzib, nə də təsdiq etdi