AZƏRBAYCAN ÇEMPİONATINDA HAKİM FUTBOLÇUYA SİLLƏ VURDU (AYNA, 29.11.2005)

Həftə sonu futbol üzrə XIV ölkə çempionatında onuncu turun oyunları keçirilib. Turun mərkəzi qarşılaşması Tovuzda yerli "Turan"la paytaxtın eyniadlı təmsilçisi arasında olub. Görüş əsasən qonaqların üstünlüyü şəraitində keçsə də, qalib tərəf meydan sahibləri olub. İlk hissədə fərqlənmək üçün hər iki komandanın şansı olsa da, fasiləyədək hesab açılmayıb. 62-ci dəqiqədə "Turan"ın ən məhsuldar futbolçusu Junivan Suares komandasının qoluna imza atıb. Bunun ardından "Bakı"nın əsas çalışdırıcısı Əsgər Abdullayev meydana daha bir hücumçu buraxsa da, meydan sahibləri sərfəli hesabı sonadək qoruya biliblər. Sonuncu ölkə çempionu "Neftçi" Tofiq Bəhramov adına Respublika stadionunda elitanın debütantı "Olimpik"lə gücünü sınayıb. Görüşə Zaur Tağızadəsiz çıxan "Neftçi" 90 dəqiqə boyu rəqib qapısına yol tapa bilməyib. "Flaqman" üstünlüyə malik olsa da, "Olimpik"in qapısı önündə real qol vəziyyətləri yaratmaqda çətinlik çəkib. Əvəzində görüşün ən təhlükəli epizodunu nominal qonaqlar təşkil ediblər. Ancaq "Neftçi"nin veteran müdafiəçisi İqor Getman topu boş qapıdan çıxarıb. Bu heç-heçə ilə "Neftçi" bu mövsüm ardıcıl dördüncü dəfə öz meydanında qələbəyə həsrət qalıb. Ağasəlim Mircavadovun yetirmələri doğma divarlar arasında sonuncu dəfə üçüncü turda "Göyəzən"ə qalib gəlmişdilər. Paytaxtda daha bir qarşılaşma ordu stadionunda baş tutub. Burada MOİK "Qarabağ"la oynayıb. Ağdamlılar "hərbçilər"i üstələməklə kubok oyunu da daxil olmaqla ardıcıl üçüncü oyunda qalib gəliblər. "Qarabağ"ın 2:0 hesabı ilə qələbə qazandığı görüşdə Samir Musayev (penaltidən) və Dmitri Sokolovski fərqləniblər. Sumqayıtda İmişlinin "MKT-Araz" klubu "Xəzər-Lənkəran"la qarşılaşıb. Maraqla gözlənilən matçın birinci hissəsi darıxdırıcı keçib. Ancaq fasilədən sonra azarkeşlər maraqlı qarşılaşmanın şahidi olublar. 51-ci dəqiqədə Fabio Luis Ramim "MKT-Araz"ı hesabda irəli çıxarıb. Ancaq az sonra Samir Əliyev başla gözəl qola imza atmaqla bərabərliyi təmin edib. 77-ci dəqiqədə gözlənilməz hadisə baş verib. "Xəzər-Lənkəran"ın müdafiəçisi Miroslav Saviç kobud oynadığından hakim cərimə zərbəsi təyin edib. Bu zaman isə oyunun baş hakimi Azad Mütəllimovla Lənkəran klubunun müdafiəçisi mübahisəyə girişiblər və referi heç kimin gözləmədiyi halda serb futbolçuya sillə vurub. Ardınca isə Mütəllimov heç nə olmayıbmış kimi Saviçə qırmızı vərəqə göstərərək onu meydandan kənarlaşdırıb. Azlıqda qalan cənublular final fitinə bir dəqiqə qalmış qapılarında ikinci topu görüblər. Zoran Boldovaliyev görüşdə son nöqtəni qoymaqla yanaşı, həm də "MKT-Araz"a mühüm qələbə qazandırıb. Bunun ardından "Xəzər-Lənkəran"ın əsas çalışdırıcısı Nazim Süleymanov istefaya göndərilib. Bu vəzifəni yeni baş məşqçi təyin olunanadək Şenol Fidan icra edəcək. Bu qərarları klubun prezidenti Mübariz Mənsimov matçdan sonra komanda üzvləri ilə görüşdə verib. O, birinci dövrənin başa çatmasına üç tur qaldığından yeni baş məşqçinin dövrələrarası fasilədə komandaya təşrif buyuracağını deyib. Bundan başqa, iki futbolçu - Marinko Petkoviç və Slaven Stankoviç də komandadan uzaqlaşdırılıblar. Səbəb kimi, onların oyun səviyyəsinin aşağı olması göstərilib. Gəncədə eyniadlı komanda "Şahdağ"la gücünü sınayıb. Turnir cədvəlində qonşu olan komandaların görüşündə meydan sahibləri 3 xalı bayram ediblər. İlk hissədə hesab açılmasa da, fasilədən sonra azarkeşlər məhsuldar oyunun şahidi olublar. 47-ci dəqiqədə İrakli Beraya "Gəncə"ni hesabda önə çıxarıb. Sonra Eldəniz Məmmədov 80 və 82-ci dəqiqələrdə vurduğu qollarla meydan sahiblərinin üstünlüyünü 3 topa çatdırıb.я"Şahdağ"ın gücü yalnız təsəlliverici qola çatıb. Çempionatın lideri "İnter" birinciliyin autsayderi "Göyəzən"i məğlubiyyətə uğradıb. Yeganə qolu 54-ci dəqiqədə Laki İdahor vurub. Bazar günü Sumqayıtda "Gənclərbirliyi" Yevlax "Karvan"ı ilə görüşüb. Oyun boyu rəqibindən üstün oyun nümayiş etdirən Yunis Hüseynovun yetirmələri 3:0 hesabı ilə qalibiyyət əldə ediblər. Qollara Yakuba Bamba (2 dəfə) və İsmayıl Məmmədov imza atıblar.