Bədavi Hüseynov Azərbaycan rekordunu təkrarladı

Komandamızın kapitanı Bədavi Hüseynov Azərbaycan çempionatları tarixinin rekordunu təkrarlayıb. 34 yaşlı müdafiəçimiz buna çempionluq sayında nail olub.

“Qarabağ” Misli Premyer Liqasının XXXII turunun “Sabah”la səfər oyununda (1:1) 2024/25 mövsümünün qızıl medallarını təmin edib. Bu, Bədavinin komandamızla birlikdə 11-ci çempionluğu olub.

2012-ci ilin yayından komandamızın formasını geyinən Hüseynov bunadək 2013/14, 2014/15, 2015/16, 2016/17, 2017/18, 2018/19, 2019/20, 2021/22, 2022/23 və 2023/24 mövsümlərində də Azərbaycan çempionu adına qazanıb.

Müdafiəçimiz bununla da Azərbaycan çempionatları tarixinin rekordçusu Mahmud Qurbanova çatıb.

Qeyd edək ki, komandamızda oynadığı bütün mövsümlərdə mükafat qazanan Hüseynov 2012/13 və 2020/21 mövsümlərində gümüş medala sahib çıxıb.