BERTİ FOQTS İCTİMAİYYƏTƏ TƏQDİM OLUNDU

Bu gün «Park İnn» otelində milli komandamızın yeni baş məşqçisi Berti Foqts ictimaiyyətə təqdim olundu. Tədbirdə almaniyalı mütəxəssislə yanaşı, AFFA prezidenti Rövnəq Abdullayev, Gənclər və İdman naziri Azad Rəhimov, AFFA-nın vitse-prezidenti, millət vəkili Rauf Əliyev, vitse-prezident Elşad Nəsirov və baş katib Elxan Məmmədov iştirak edirdilər. Mərasimi AFFA prezidenti Rövnəq Abdullayev açdı: «Əziz qonaqlar, hamınızı salamlayıram. Bildiyiniz kimi, almaniyalı mütəxəssis Berti Foqts İcraiyyə Komitəsinin qərarı ilə milli komandaya baş məşqçi təyin olunub. Biz bu gün onu sizlərə təqdim etmək üçün buraya toplaşmışıq. Berti Foqts 1946-cı ildə Almaniyada anadan olub və öz ölkəsində böyük futbol məktəbi keçib. Məşqçi kimi 1996-cı ildə Avropa çempionu titulunu qazanan alman mütəxəssis 2009-cu ilin dekabrına qədər yığmamızı çalışdıracaq. Ona bu işində uğurlar arzulayıram. Ümid edirəm ki, o, azarkeşlərimizi yeni-yeni qələbələrlə sevindirəcək».
Daha sonra Rövnəq Abdullayev Berti Foqtsa Azərbaycan yığmasının formasını və üzərində bayrağımız əks olunan şərf təqdim etdi. Nitqini yekunlaşdıran AFFA prezidenti sözü milli komandamızın yeni baş məşqçisinə verdi. Foqts Azərbaycan yığmasına baş məşqçi təyin olunduğu üçün sevindiyini bildirdi: «Bu ölkədə çalışmaq məndə fərqli duyğular oyadır. Yeni təyinatımla fəxr edirəm. AFFA rəhbərliyi ilə görəcəyimiz işlərlə bağlı danışmışıq. Assosiasiyada çalışan insanlarla da tanış oldum. Məncə, onlarla bərabər işləmək çox xoş olacaq. Azərbaycan iqtisadiyyatında inkişaf gedir. Ümid edirəm ki, futbolda da belə olacaq. Düzdür, bilirəm ki, 2010-cu ildə dünya çempionu ola bilmərik. Amma Almaniya və Rusiya kimi böyük futbol ölkələrindən xallar ala bilərik. Bunun üçün klublarla həmrəy çalışmalıyıq. Onlara da müraciət edib demək istəyirəm ki, köməkliklərini əsirgəməsinlər. Düşünürük ki, ən azı ayda bir dəfə yığma komanda ilə təlim-məşq toplanışı keçirək».

Almaniyalı mütəxəssis fikirlərini bitirdikdən sonra jurnalistlərin suallarını cavablandırdı.

- Azərbaycanda çalışacağınız müddətdə həyata keçirəcəyiniz iş planını müəyyənləşdirmisinizmi?
- Yaxın müddət üçün plan artıq hazırdır. Biz bunu baş katiblə də müzakirə etmişik. Ayda bir dəfə yığmanı bir araya gətirməyi düşünürük. Klub məşqçiləri ilə də görüşlərimiz olacaq. Azərbaycan kubokunun finalından sonra isə Almaniyaya gedəcəyik. Yığmanın üzvləri orada tibbi müayinədən keçəcəklər. Bundan sonra Andorra millisi ilə yoldaşlıq oyununa hazırlaşacağıq.

- AFFA rəhbərliyi 2010-cu il dünya çempionatının seçmə mərhələsində sizin qarşınıza hansı məqsədlər qoyub?
- Məqsəd qrupumuzda yer alan rəqibləri özümüzdən çəkindirməyi bacarmaqdır. Yəni yaxşı oyun nümayiş etdirib azarkeşlərimizi sevindirməyə çalışacağıq.

- Almaniya yığması həmişə psixoloji hazırlığı ilə seçilib. Bizim milli komandanı da eyni şəkildə hazırlamaq mümkün olacaqmı?
- Psixoloji hazırlıq fiziki hazırlıq qədər önəmlidir. Amma mən oyunçularla yaxından tanış olmamışam. Ona görə də bu barədə danışa bilmərəm. Əgər siz meydana uduzmaq üçün çıxırsınızsa, onda oynamağa dəyməz. Mən bilməliyəm ki, çətin anlarda hansı futbolçu necə reaksiya verir. Bunun üçün gərək bir müddət komandanın içində olum.

- Qarşıdakı seçmə mərəhələdə yığma komandamız neçə xal toplaya bilər?
Rövnəq Abdullayev: – Əsas odur ki, istəyimizi həyata keçirə bilək. Qələbələrlə azarkeşlərimizi sevindirməyi bacaraq. Bunun üçün istək olmalıdır. İstək olan yerdə hər şeyə nail ola bilərik. Futbolumuzun bu səviyyədə olması hamımızın günahıdır. AFFA rəhbərliyi, futbol ictimaiyyəti və jurnalistlər birgə fəaliyyət göstərməlidir ki, futbolmuzu inkişaf etdirə bilək.
Berti Foqts: - Mən desəm ki, biz otuz xal yığacağıq, deyəcəksiniz, yalançıyam. Desəm, üç xal qazacanağıq, onda deyəcəksiniz ki, zəhmət olmasa, gedin evinizə. Söz verirəm ki, rəqiblərimizi Bakıda çətin oyunlar gözləyir və biz axıra qədər mübarizə aparıb qələbə qazanmağa çalışacağıq.

- Fevral ayında Afrika Millətlər Kubokundakı uğursuzluqdan sonra Nigeriya yığmasının baş məşqçisi postundan istefa verməyəcəyinizi bildirmişdiniz. Amma istefa verdiniz. Bunun səbəbi AFFA-dan gələn sərfəli təklif deyildi ki?
- Nigeriyada işləmək mənim üçün çox xoş idi. Lakin gördüm ki, Nigeriya yığmasının oyunçuları ilə yaxşı nəticə qazanmaq çətin olacaq. Bu da işimə mənfi təsir göstərirdi. Mənim üçün çox maraqlıdır ki, qazanacağım pulla bağlı sual vermədiniz. Əslində, uzun müddət peşəkar futbol oynayan və 21 il Almaniya futboluna məşqçi kimi xidmət edən insanın pula ehtiyacı yoxdur.

- Müqavilənin müddəti ilə yanaşı, maliyyə şərtlərini də açıqlaya bilərsinizmi?
- Sözsüz ki, mən havayı işləməyəcəyəm. Nəsə qazanmalıyam. Amma məbləği açıqlaya bilmərəm. Əsas odur ki, həm mən, həm də AFFA rəhbərliyi şaddır. Ümid edirəm ki, siz də şad olacaqsınız.

- Rövnəq müəllim, şəffaflıq üçün maliyyə şərtlərini siz açıqlaya bilərsinizmi?
- Yalnız onu deyə bilərəm ki, bu müqavilədə yüksək məbləğdən söhbət gedə bilməz. Lakin müqavilənin şərtlərinə görə bunu açıqlaya bilmərik.

- Tanınmış mütəxəssis Karlos Alberto Torres yığmamızı çalışdırarkən milli çempionatın qarşılaşmalarını izləmirdi. Siz necə, Premyer Liqanın oyunlarına gələcəksinizmi?
- Mən nəinki ölkə çempionatının, hətta kubok oyunlarını da izləyəcəyəm. Bizim klubların baş məşqçiləri ilə də tez-tez görüşlərimiz olacaq. Aşağı yaş qrupu üzrə yığma komandaların da görüşlərini izləməyə çalışacağam. Hesab edirəm ki, bu çox vacibdir.

- Hər ayın neçə həftəsini Azərbaycanda olacaqsınız?
- Ölkə çempionatı və kubok oyunları zamanı Bakıda olacağam ki, yığmanın üzvlərini izləyə bilim. Həm də ümid edirəm ki, yeni futbolçular «kəşf edəcəyik».
R.A. – Müqavilə şərtlərinə əsasən, Berti Foqts hər ayın çox hissəsini Bakıda keçirəcək.

- Ölkəmizin mədəniyyəti ilə tanış ola bilmisinizmi?
- Hələ ki çox yaxından tanış olmamışam. Buraya gələnə qədər azərbaycanlılardan 1966-cı ildə keçirilən dünya çempionatının final qarşılaşmasında verdiyi qərara görə yalnız Tofiq Bəhramovu tanıyırdım.