`Beşiktaş` finalın bir addımlığında

`Qartal` Ankarada `kükrədi`

Türkiyə kubokunun yarımfinal mərhələsinin oyunlarına start verilib. İlk oyun günündə `Beşiktaş` səfərdə `Ankaraspor`un qonağı olub.
`Qara Qartal`lar hesabda geri düşdükləri matçda tezliklə özlərinə gələrək, cütün taleyini ilk qarşılaşmada həll edə biliblər. Belə ki, oyun `Beşiktaş`ın 3:1 hesablı qələbəsilə başa çatıb. Hesabı 25-ci dəqiqədə `Ankaraspor`un oyunçusu Bilal Kısa penaltidən açıb. 42-ci dəqiqədə Delqado bərabərliyi təmin edib. 77-ci dəqiqədə Flip Holosko `Qara Qartal`ları hesabda irəli çıxardıb. Matçda son nöqtəni Yusuf Şimşək qoyub. O, 89-cu dəqiqədə hesabı 3:1-ə çatdırıb. Bununla da `Beşiktaş` demək olar ki, finala vəsiqəni təmin edib.