BÖYÜKAĞA AĞAYEV: "HƏR ŞEYƏ MEYDANDA AYDINLIQ GƏLƏCƏK..."

UEFA kuboku ilkin təsnifat mərhələsinin ilk oyunu "Zimbru" - "Qarabağ" matçına həsr olunmuş mətbuat konfransı keçirildi. Yerli vaxtla 11:00-da yerli komandanın nümayəndələri Mətbuat işçiləri ilə görüşdülər. Baş məşqçi və komandanın kapitanı sabahkı oyunda böyükhesablı qələbə qazanacaqlarını, cütün taleyinə ilk oyunda aydınlıq gələcəyini bildirdilər. Sonra komandamızın nümayəndələri mətbuat otağına buyurdular.Açılış sözü ilə komandamızın Mətbuat Katibi Asif Əsgərov çıxış etdi. Sonra suallar verildi. İlk sual da məhz yerli baş məşqçinin fikirlərinə münasibət oldu. Böyükağa Ağayev: "Üzərimizdə böyükhesablı qələbə qazanmaq haqqında yalnız sizin baş məşqçiniz düşünə bilər. Mən yalnız onu deyə bilərəm ki, hər şeyə meydanda aydınlıq gələcək." Suallardan zədəllilərin komandada çoxluğu, millidə neçə futbolçumuzun oynaması, hansı nəticənin bizə uyğun olması, hazırlığımızın gedişi, favoritin kimliyi və digər suallar maraq doğurdu. Cavablar da konkretliyi ilə fərqləndi: Əsas itkimiz orta xətt oyunçumuzla bağlıdır ki, onu Türkiyədə saxladıq. Hazırlığımızı da məhz Türkiyədə keçdik. Altı futbolçumuz millilərdə (əsas və U-21) oynayır. Favorit iki oyundan sonra bilinəcək..."