C QRUPU: SERBLERİN BİABIRÇI MƏĞLUBİYYƏTİ...

Dünya Çempionatında C və D qruplarının da ikinci turunun oyunları keçirildi. Bununla da daha iki 1/8 finalçı məlum oldu. C qrupunun ilk görüşündə Argentina Serbiya və Çernaqoriya millisi ilə qarşılaşdı. Ölüm qrupu adlandırılan bu qrupda Argentina rəqibini ölümçül zərbə ilə "evə" göndərdi. Hər hissədə üç dəfə rəqib qapısına yol tapan cənubi amerikalılar 1/8 finala möhtəşəm qələbə ilə adlarını yazdılar. Digər görüşdə isə Holandiya Kot D İvuar millisini 2:1 hesabı ilə məğlub edə bildi. D qrupunda isə dünən bir oyunla ikinci tura start verildi. Meksika Angola ilə görüşdə çox çalışsa da, sonda hesab açılmadı- 0:0. Qrupun digər görüşü bu gün keçiriləcək.