DAHA BİR QƏLƏBƏ...

"STANDART" 0 - 1 "QARABAĞ"

“Qarabağ” çətin “Standart” səfərindən qələbəylə döndü. Demək olar ki, bütün iddialıları büdrədən elitanın debütantı komandamızın 3 xal qazanmasına mane ola bilmədi.

Komandamız Kənan Kərimovun zədəsi ilə əlaqədar olaraq hücumçunun xidmətindən istifadə edə bilməyəcəyi öncədən bəlli idi. Belədə baş məşqçimiz Rasim Kara Vaqifi irəlidə tək oynatmağa qərar vermişdisə oyun zamanı taktiki dəyişikliyə əl ataraq Viktoru da hücuma çəkirdi.

İlk on dəqiqə bizim ərazi üstünlüyümüzlə keçdi. Bu anlarda Ayxan Abbasovun sağ cinahdan asmasına son anda heç kim yetişə bilmədi. 14-cü dəqiqədə Qoqanın zərbəsi yadda qalan oldu. 20-ci dəqiqədən etibarən “Standart” ərazi üstünlüyünü ələ keçirməyə çalışsada qapımız qarşısında real qol təhlükəsi yarada bilmədi. Ümumiyyətlə, həmin gün müdafiəçilərimiz rəqibə keçidə imkan vermədi.

İlk yarının sonlarına yaxın təşəbbüsü ələ keçirməyimiz çox keçmədən öz bəhrəsini verdi. Sol cinahdan qurulan hücum zamanı Qoqa topu cərimə meydançasına göndərdi. Vaqif isə  hər kəsi qabaqlayaraq qarşısıalınmaz zərbə endirdi. 0:1. Qoldan dərhal sonra hesabı artıra bilərdik. Lakin Viktor və Ayxanın anlaşılmazlığı nəticə gətirmədi.

İkinci yarıya ev sahibləri hücumlarla başlasalarda məharətlə müdafiə olunan komandamız tez-tez əks-hücum şansı qazansa da, hesabı dəyişdərəcək zərbə gəlmirdi ki, gəlmirdi. İkinci yarıda oyuna nəzarəti əlində saxlayan komandamız son dəqiqədə Viktorla daha bir şansı qaçırdı. Lakin hər şeyə rağmən komandamız “Standart”ı səfərdə məğlub edərək mövsümdəki 5-ci qələbəsini əldə etdi.