ELXAN ABDULLAYEV "QARABAĞ"ın BAŞ MƏŞQÇİSİ OLDU (AYNA, 12.07.2005)

Futbol üzrə XIII milli çempionatda zəif nəticə göstərən "Qarabağ" klubunu əksər oyunçuların tərk etdiyi məlum idi. Bir müddətdir komandanın baş məşqçisi postu boş idi. Bu vəzifəni çalışdırıcı Səttar Əliyevin icra edəcəyi gözlənilsə də, dünən komandanın rəhbərliyi Elxan Abdullayevə üstünlük verib. "Qarabağ"ın vitse-prezidenti Tahir Gözəl ən yaxşı variantı seçdiklərini vurğulayıb. Klubun rəsmi İnternet saytında qeyd olunub ki, komandanın yeni baş məşqçisi Azərbaycan futbolunda gənc olmasına baxmayaraq, kifayət qədər tanınan Elxan Abdullayevdir. T.Gözəl E.Abdullayevi təbrik edərək, ona uğurlar arzulayıb. Məşqçiyə hər cür şəraitin yaradılacağını vurğulayan vitse-prezident komandanın qarşıdakı mövsümdə adına layiq oyun göstərəcəyinə, azarkeşlərinə həyəcanlı anlar yaşadacağına əmin olduğunu söyləyib: "Bunun üçün hər cür şərait var. Sadəcə, cavan heyətlə tarix yazacağımıza əminəm!". Bundan sonra yeni baş məşqçi E.Abdullayev söz alıb. O, əvvəlcə ona etimad göstərdiklərinə görə klub rəhbərliyinə təşəkkür edib: "Təbii ki, Azərbaycan futbolu deyəndə, bir sıra klublarla yanaşı, ilk növbədə "Qarabağ" adı yada düşür. Bu komandanın baş məşqçisi olmaq hər bir çalışdırıcının arzusudur. Bu vəzifəyə layiq görüldüyümə görə həm qürur duyur, həm də Tahir bəyin dediyi kimi, tarix yazmaq haqqında düşünürəm". 35 yaşlı E.Abdullayev Azərbaycan Dövlət Bədən Tərbiyəsi və İdman Akademiyasını bitirib. Hazırda milli komandanın da çalışdırıcısı olan Abdullayev "Dinamo"nun (indiki "Bakı") baş məşqçisi işləyib. Məlumat üçün bildirək ki, dünən çalışdırıcı Səttar Əliyevin rəhbərliyi altında "Qarabağ" məşqə başlayıb. Bir müddətlik fasilədən sonra klubun sabiq oyunçusu Müşfiq Hüseynov komandaya qayıdıb. Onunla yanaşı, təcrübəlilərdən Vitali Kovalyov, Mübariz Orucov, Azər Cabbarov, Mustafa Engin və başqaları məşq prosesində iştirak ediblər. Klubun legionerləri isə bir neçə gün sonra yerli oyunçulara qoşulacaqlar. Ardından isə komandanın yeni mövsüm üçün komplektləşdirilməsi prosesi başlanacaq.