EMRAH ÇELİKEL: "TURU KEÇƏN KOMANDA BİZ OLACAĞIQ!"

Matça saatlar qalır. Komandamızın azarkeşlərinə özlərini komanda ilə birgə hiss eləməsi üçün hər bir vasitədən istifadə etməyə çalışırıq. Futbolçuların düşündüklərini azarkeşlərimizin diqqətinə çatdırdıqdan sonra matçdan bir neçə saat öncə klubun Direktoru Emrah Çelikelin də fikirlərini öyrənmək qərarı verdik: - Klub başçısı kimi, komandamızın hazırlığı sizi qane etdimi? - Komandamızın Baş Məşqçisindən istədiyi hazırlıq planını aldıq və ən yaxşı şəraitin yaradılması üçün əlimizdən gələni əsirgəmədik. Komandanın fiziki hazırlığı üçün Azərbaycanın gözəl guşəsi olan Qaxda hazırlıq keçən komandanı hazırlıq oyunları keçirmək üçün Türkiyəyə apardıq. Orada da baş məşqçimizin istəyi ilə yalnız Türkiyə Super Liga komandaları ilə oyunlar oynamasına şərait yarada bildik.... - Bütün bu proseslərdə komandanın yanında olan bir şəxs kimi, nəticədən razısınızmi? - Komandanın hazırlığından, futbolçu və texniki heyət arasındakı münasibətdən, hər bir klub üzvünün öz sahəsində komandanın uğurunda pay sahibi olmaq istəyindən narazı ola bilmərəm. Ən əsası isə Türkiyədə komandanın üç oyunda güclü rəqiblərə qarşı oyunlardan üzüağ çıxdığı məni çox sevindirir. - Bu gün komandamızı hazırlığın nəticəsi olaraq məsul oyun gözləyir. Sizcə oyun necə başa çatacaq? - Belə tip yarışlarda turu keçmək iki oyunun nəticəsinə görə olur. Amma "Qarabağ"ın ilk oyundaca böyük ölçüdə adını ikinci mərhələyə yazacağına əminəm. Komandamız güclüdür, istəklidir, əzmkardır və ən əsası kollektiv oyun göstərir. Mən komandamın bu günkü oyunda qalib gələcəyinə şübhə etmirəm və bütün azarkeşlərimizə bildirmək istəyirəm ki, Azərbaycan UEFA kubokunda mərhələ keçəcək ilk komanda adını da "QARABAĞ" qazanacaq! ! !