Əzəli rəqabət... Əbədi dostlar... indi Quzanlıda !

Bazar günü Unibank Premyer Liqasının növbəti turu çərçivəsində`Əzəli Rəqib,Əbədi Dost` adlandırılan iki komanda üz-üzə gələcək. Milli çempionatın iki ən qocaman komandası, bütün çempionatların iştirakçıları olmuş `Qarabağ` - `Neftçi` qarşılaşması bu dəfə Quzanlı qəsəbə stadionunda baş tutacaq. Daim gərgin mübarizəyə, maraqlı mücadiləyə səbəb olan derbi bu dəfə də az maraq doğurmur. Tarixə nəzər salaq...

Komandamız bazar günü Ağdamda qarşılaşacağı əbədi rəqibinə qarşı uğurlu oynayır. Belə ki, `Qarabağ`həm rəqib, həm də doğma meydançasında son 3 ildə məğlubiyyətsizlik seriyasını  davam etdirir. Hətta qol da buraxmayan `Qarabağ`ımız son matçda (26.04.2009) Admir Telinin gözəl qolundan sonra rəqib üzərində qələbə qazanmışdır.

Komandamız növbəti tur öncəsi Bakıdakı son məşqini Suraxanı qəsəbə stadionunda edərək Quzanlıya yola düşdü. Maç öncəsi yüngül məşqlə kifayətləncək `Qarabağ` matç saatını gözləyəcək. Düşərgədə ab-hava yüksəkdir. Millidən geri dönmüş futbolçuların da yüksək əhval-ruhiyyədə olması digər futbolçulara da müsbət təsir göstərir. Hər kəs növbəti turda yalnız qələbə qazanaraq vahid liderə çevrilmək barədə düşünür.

Xatırladaq ki, 18 oktyabrda baş tutacaq matç saat 16-10`dan etibarən AzTV ilə canlı yayımlanacaq.