ƏZMKAR QƏLƏBƏ 3 QOLLA GƏLDİ

3-də gəldi. Əzmkar qələbə və ardıcıl 3-cü qələbə, 3 qolla gəldi. İlk yarıda rəqibin qapısına yol arayan komandamız, ikinci hissədə meydanda fırtınalar qopardı.

Baş məşqçimiz Rasim Kara “qalib heyəti dəyişməzlər” prinsipinə əsasən, ötən turda “Turan”a qalib gəlmiş “11”liyi eyniylə meydana buraxmışdı. Lakin, matçın ilk dəqiqələri bizim üçün kabus kimi başladı. Artıq 4-cü dəqiqədə “Gənclərbirliyi” futbolçusunun sağ cinahdan ötürməsi zamanı Viktor İbekoyi Azər Mehdiyevlə hava mübarizəsinə çıxsa da, hakim gözlənilmədən qapımıza penalti təyin etdi. Topa yaxınlaşan Staniç Fərhadın topun istiqamətini düzgün müəyyənləşdirməsinə baxmayaraq tora qovuşdurdu.0:1. Gözlənilməz qoldan sonra komandamız təxminən 10 dəqiqə meydanın mərkəzini ələ keçirmək uğrunda mübarizə apardı. Getdikcə təzyiqləri artıran, futbolçularımız, Aslan, Vaqif, Kənanla təhlükəli həmlələr etsə də, qolu tapmaq mümkün olmurdu. Bu arada, qapımızda bir təhlükə də yaşadıq. Ruslan Musayevin uzaq məsafədən vurduğu zərbə qapı tirinə dəyərək gərgin anlar yaşatdı.

İkinci yarının başlanğıcında komandamız bir əvəzetmə ilə başladı. Azər Məmmədov yerini Qoqa Berayaya buraxdı. Bu oyunun taleyinə böyük təsir etdi. Getdikcə, təzyiqlərin artmasına dözməyən sumqayıtlılardan Azər Mehdiyev 2-sarı vərəqəsini alaraq meydandan qovuldu. Bu hadisədən 10 dəqiqə sonra isə “Qarabağ” artıq hesabı bərabərləşdirmişdi. Bəlkə də karyerasının ən yaxşı oyununu keçirən Viktor sağ cinahda 2 rəqibini keçərək yerlə iti ötürmə verdi. Topa hamıdan tez çatan Vaqif hesabı bərabərləşdirməklə, carı çempionatda 3-cü qolunu vurdu. Cəmi 4 dəqiqə sonra isə artıq hesabda önə keçdik. Bu dəfə sol cinahdan Qoqa irəliləyərək, iti ötürmə verdi və Viktor yıxılaraq topu başla tora göndərdi. Qoldan sonra da hücumları davam etdirən komandamız 2 dəfə Kənanla təkbətəkə çıxsa da inamla oynayaraq fərqin böyüməsinə imkan vermədi. Lakin, son dəqiqələrdə qapıçı da qolumuza əngəl ola bilmədi. Yenə də Viktor bu dəfə sol cinahdan sürətlə irəliləyərək əks cinahda boş dayanmış ikinci yarıda meydana girən Ayxanı gördü. Abbasov isə “Qarabağ”da qol hesabını açmaqda çətinlik çəkmədi.

Oyundan ən maraqlı anlarla  FOTOQALEREYA  bölümündə tanış ola bilərsiniz..

Oyunda vurulan qollara canlı baxmaq üçün DİGƏR YAZI  -ya daxil olun...