“FƏNƏR” İŞİ BİTİRDİ

Türkiyə superliqasının cari mövsümün əsas matçı İnönü stadionunda keçirildi. Bir neçə tur öncə ən yaxın rəqibindən 9 xal öndə olan “Fənərbaxça” ardıcıl xal itkilərinə məruz qaldıqdan sonra “Beşiktaş”la fərq 2-yə enmişdi. “Qara Qartal” evdə “Fənər”i yensəydi. 2004-2005-mövsümündən sonra ilk dəfə liderliyə yüksələcəkdi.  Üstəlik, “Beşiktaşın” son 7 matçda cəmi bir qol buraxması, 8 oyunda bir xal itirməsi, “Fənər”in uzun müddətdən sonra liderlik taxtını təhvil verə biləcəyinə inam yaratmışdı. Lakin, gözlənilənlərin olaraq, qonaqlar nəinki xal itirdi, əksinə derbidə qələbə qazanaraq çempionluğun taleyini böyük ölçüdə həll etdi. Görüşün taleyini həll edən yeganə qol isə 12 dəqiqədə vuruldu. Mövsüm ərzində ciddi tənqidlərə düçar olan Matey Kejman Tuncayın ötürməsindən sonra cari mövsümdə 7 qoluna imza atdı.

Çempionatın sonuna üç tur qalmış “Fənərbaxça” ən pis halda 4 xal topladığı halda çempionluğa qovuşacaq. Üstəlik, “Beşiktaş” son 3 oyunu da maksimum xal toplamalıdı.