FƏRHAD VƏLİYEV: "MƏĞLUB EDİLMƏZ KOMANDA YOXDUR"

 “Qarabağ” – “Xəzər-Lənkəran”... Matça iki gün qalıb. “Qarabağ” Futbol Klubu bu həftəlik son məşqlərinə çıxır. Bu maraqlı matçöncəsi futbolçuların da fikrini bilmək maraqlı olardı. Görəsən futbolçularımız bu qarşılaşma haqqında nə fikirləşirlər?

Aslan Kərimov, “Qarabağ”ın və millinin kapitanı: “Komandanın əhval-ruhiyyəsi çox yüksəkdir. “Xəzər-Lənkəran” çempionatın öndə gedən komandalarından biridir. Amma bu bizi qorxutmur. Rəqibi yaxşı tanıyırıq, bu özü isə çox önəmli bir faktdır. Azarkeşləri çox maraqlı bir oyun gözləyir. Amma əfsuslar olsu ki, sarı kart limitinin dolması səbəbindən mən bu oyunda meydana çıxa bilməyəcəyəm. Əminəm ki, uşaqlar mənsiz də qələbə qazana biləcəklər”

Azərbaycanın keçilməz müdafiəçilərindən biri, Aftandil Hacıyev: “Xəzər-Lənkəranla 8-ci qarşılaşmamızdı. Buna qədər həm qalib həm də məğlub olmuşuq. Bu oyundur və hər bir komanda həm qalib, həm də məğlub ola bilər. Amma mən rəqibin qapımıza yol tapmaması üçün əlimdən gələn hər şeyi edəcəyəm. İnanıram ki, bu qarşılaşmadan qalib ayrılacağıq”

Fərhad Vəliyev, “Qarabağ”ın və millinin 1 nömrəli qapıçısı: “Komandamız hər oyun olduğu kimi bu oyuna da yaxşı hazırlaşıb.Bəli rəqibimiz güclüdür. Bu faktı danmaq düzgün olmazdı. “Xəzər-Lənkəran” çempionluq uğrunda mübarizə aparan komandalar arasında ilk üçlükdə yer alır. Ancaq məğlub edilməz komanda yoxdur. Hər komanda meydana qələbə qazanmaq üçün çıxır. Zənnimcə qələbəni ancaq komanda oyunu göstərməklə qazanmaq olar. Biz də bunu etməyə çalışacağıq”.