Futbolçularımız Millidə qələbə ruhunda...

Bir gün sonra Lixtenşteyn Milli komandasının qonağı olacaq Azərbaycan Milli komandasının tərkibinə yeddi `Qarabağ`lı cəlb edilmişdir. Demək olar ki, hər birinin Əsas heyətdə çıxmaq şansının olduğunu nəzərə alsaq, Millinin meydana çıxacaq ilk 11-liyinin `Qarabağ`lılar təşkil edəcəyini demək mümkündür. Məhz onlarda olan əhval-ruhiyyə, qələbə istəyi çox çeyi həll edəcək. Onların hər biri ilə söhbətdə də bunu sezməmək mümkün deyil:

Elvin Məmmədov: `Bu görüş bizim üçün çox əhəmiyyətlidir. Matçda əsas rol irəlidə oynayacaq futbolçuların öhdəsinə düşəcək. Qol vura bilsək, fərqli qələbə ilə azarkeşlərimizi sevindirə bilərik. Qələbə bizim olacağına şübhə etməyin! `

Elnur Allahverdiyev: `Hamımız istəkliyik. İnanıram ki, televiziyada bizə baxan Azərbaycan xalqını matçın sonunda sevindirəcəyik. Mənim funksiyam rəqibin qol vumasına imkan verməməkdir, onu edəcəm. Qol vurmaq məsələsinə isə hücumçular baxırlar...`

 Vüqar Nadirov: `Qələbə zamanı çoxdan yetişib. Kimin hücumda oynamasından asılı olmayaraq, hər birimiz komandamızı, xalqımızı sevindirmək üçün əlimizdən gələni edəcəyik. İnşallah hər şey yaxşı olacaq...`

Rəşad Sadiqov: `Nəticə haqqında bir söz demək istəmirəm, amma meydanın mərkəzində üstün tərəf biz olacağıq. Avrokuboklardakı oyunlar bizdə qələbə ruhu yaradıb. Rəqibə hörmətlə yanaşıb, öz futbolumuzu oynasaq, çox asan, izləyicilər üçün baxımlı birt oyun olacaq...`

Vaqif Cavadov: `Proqnoz verməyi, qol vuracağam deməyi heç zaman sevməmişəm. Mənim və ya bir başqa koanda yoldaşımın bunu edəcəyinin heç bir fərqi yoxdur. Əsas odur matç sonu Azərbaycan sözünün qabağındakı rəqəm rəqib qarşısındakı rəqəmdən böyük olsun. Belə olacağına inanıram...`