GƏNCLƏR KOMANDASINDA SELEKSİONER MƏŞQÇİ: ASLAN KƏRİMOV

Aslan Kərimov 1973 -cü ildə Bakıda anadan olmuşdur. Uşaq yaşlarından futbola həvəsi onu bu sənətə professional yanaşmasına səbəb olmuşdur.Onun ilk professional komandası Bakının "Termist" klubu olmuşdur.Bundan sonra “Azəri”,"Qarabağ", “Neftçi”, “Kəpəz", “Ans-Pivani”, “Şəmkir” klublarında forma geyinən futbolçu qısa zaman kəsiyində "Baltika"nın (Rusiya) heyətində legioner həyatı da yaşamışdır. Aslan Azərbaycan çempionatında indiyədək 276 matçda forma geyinərək 5 qat Azərbaycan Çempionu olmuşdur. Bu gün o "Qarabağ"da futbol oynamaqla yanaşı, həm də Gənclər Komandasında Seleksioner-Məşqçi vəzifəsinə təyin olunmuşdur. Bu gün komandanın İcraçı Direktoru Emrah Çelikel məşqçi kimi lisenziyanı Aslan Kərimova təqdim etdi. Bu münasibətlə onu təbrik edir və onun bu haqda fikirlərini diqqətinizə çatdırırıq: "Mənə etimad göstərib, bu vəzifəni mənə həvalə etdiklərinə görə, Komandanın Prezidenti başda olmaqla bütün idarə heyətinə öz dərin təşəkkürümü bildirirəm. Mən karyeramı başa vurduqdan sonra, məşqçilik etməyi, illər ərzində əldə etdiyim az-çox təcrübəni gənclərə ötürməyi fikirləşirdim. Bu təklif mənim üçün həm sürpriz,gözlənilməz olduğu qədər , həm də arzumun çin olması baxımından lap yerinə düşdü. Əlbətdə ki, sevinirəm. "Qarabağ" komandasının gələcəyinin inşasında mənə də yer verildiyi üçün hədsiz dərəcədə minnətdaram. Mən indi futbol oynayıram. Futbolu atmağı düşünmürəm. Amma futbolçu karyeramı davam etdirərək, həm də məşqçilik kurslarında bu peşənin sirlərini öyrənəcəm." Aslan konkert atacağı addımlardan da danışdı: "Yaxın günlərdə Avropanın "B" səviyyəli diplomları üzrə UEFA tərəfindən kurslar təşkil olunacaq. Bu kurslarda yüksək dəstə komandalarından məşqçilər iştirak edəcək. "Qarabağ" Futbol Klubundan mənim bu kurslarda iştirakım məqsədəuyğun sayıldı. Mən böyük şərəf hissi keçirirəm ki, məşqçi kimi "Qarabağ"ı təmsil edəcəm."