Haydı irəli, QARABAĞ naminə! (het trik, 26.07.2006)

AĞDAMLILAR MÖHTƏŞƏM AZARKEŞ DƏSTƏYİ GÖRƏCƏK Sabah "Qarabağ" UEFA kubokunun ilkin təsnifat mərhələsinin cavab oyununda evdə "Zimbru"nu qəbul edəcək. Bu ərəfədə ağdamlılar heyətə dəvət olunan eks-"Zimbru"lu Boris Çebatorı bəyənməyib. Məşqlərdə, eləcə də "Turan"la yoldaşlıq matçında moldovalı yarımmüdafiəçini nəzərdən keçirən baş məşqçi Böyükağa Ağayev öz istəyi ilə baxışa gələn futbolçunu geri göndərib. ÜÇ İTKİYLƏ? "Turan"la oyundan söz düşmüşkən, bu qarşılaşma ağdamlılara baha başa gəldi. Məhz həmin oyunda əzələlərini dartan Azər Məmmədov, Sergey Sokolov və Hakan Dəmirin matça çıxıb-çıxmayacağı sual altındadır. Çox güman ki, bu futbolçular "Zimbru"yla oyunu buraxacaqlar. Klubun mətbuat xidmətindən verilən məlumata görə onların oynayıb-oynamayacağı sabah axşam keçirilən son tibbi müayinədən sonra məlum olacaq. Adlarını çəkdiyimiz futbolçuların matça hazır olması üçün həkimlər əllərindən gələni əsirgəmirlər. Əgər Məmmədov, Sokolov və Dəmir vacib oyunda meydana çıxmazlarsa, onda "Qarabağ"ın işinin çətin olacağını bəri başdan güman etmək olar. Heç şübhəsiz ki, komandada onları lazımı səviyyədə əvəzləyəcək futbolçu yoxdur. "QARABAĞ"A DƏSTƏK OLAQ Heç şübhəsiz ki, sabahkı oyunda azarkeşlər stadionda boş yer qoymasa, bu amil komandanın oyununa öz töhfəsini vermiş olacaq. Əbəs yerə demirlər ki, azarkeşlər 12-ci futbolçudur. Üç futbolçunun yoxluğunda bir qədər əhvalı korlanan "Qarabağ"lıların kefini yalnız güclü azarkeş dəstəyi aça bilər. Deyəsən, bu mənada problem yaşanmayacaq. Belə ki, yay mövsümüylə əlaqədar öz ölkələrinə qayıdan komandanın türkiyəli fanatları "Zimbru"yla oyuna görə geri dönüblər. Həmin fanatlar srağagün Suraxanı qəsəbə stadionunda "Qarabağ"ın məşqini də izləyərək, komandanı durmadan dəstəkləyiblər. Əminliklə söyləmək olar ki, onların oyun günü səsləndirəcəyi müxtəlif şüarlar futbolçularda xoş təəssürat oyadacaq, rəqibi isə təzyiq altına salacaq. Fanatlar arasında ən çılğını olan Uğur Aydın bu barədə aşağıdakıları deyib: "Biz Türkiyədən Bakıya komandamıza dəstək olmağa gəldik. Moldovada son dəqiqələrdə buraxdığımız qolla heç-heçəyə nail olan "Zimbru"nu Bakıda böyük sürpriz gözləyir. Biz Bakıda onlara yalnız qonaqpərvərlik vəd edə bilərik. Oyun haqda isə heç düşünməsinlər. "Qarabağ" ən yüksəklərə layiqdir. İnanıram ki, bizim də 12-ci futbolçu kimi meydanda özümüzü hiss etdirəcəyimiz oyunda "Qarabağ" tarixi uğura imza atacaq". Bundan başqa, "Qalatasaray"ın Bakıda fəaliyyət göstərən fan-klubu "ultrAslan" da oyun günü "Qarabağ"a dəstək olacaq. Sözsüz ki, onlar da tribunalardakı fəaliyyətiylə matça öz damğasını vura biləcəklər. Azərbaycanlı "aslanlara" 200 bilet ayrıldığı bildirilir. "Sarı-qırmızılıların" tribunaları coşduracağını gözləməyə dəyər. Hər halda "ultraAslanlar"da qarşılaşmaya ciddi hazırlaşır. SİNDROMU QIRIB TARİX YAZA BİLƏCƏYİKMİ? Hamımız inanırıq ki, Ağdam təmsilçisi "Zimbru" səddini inamla dəf edərək, tur adlayan tərəf olacaq. Əgər bu istəyimiz baş tutsa, onda "Qarabağ" Moldova sindromunu qıran, həm də UEFA-da mərhələ adlayan ilk təmsilçimiz olacaq. Komanda indi buna çox yaxındır. İntertoto kubokunda çıxış edərək mərhələ adlayıb ölkə futbolunda da bir ilkə imza atan "Qarabağ", bu şücaətini qitənin ikinci mötəbər klub turnirində təkrarlamalıdır. "ZİMBRU" LİDER KİMİ GƏLİR Nə qədər xoş olmasa da deyək ki, "Qarabağ"ın rəqibi "Zimbru" bura ölkə çempionatının lideri kimi gəlir. Bu gün paytaxta təşrif buyuracaq moldovalılar iyulun 23-də Moldova çempionatının 4-cü tur çərçivəsində səfərdə "Olimpiya" ilə üz-üzə gəlib. "Zimbru" aşağıdakı heyətlə meydana çıxıb: Kalança, Dobre, Erxan, Amarandey, Frantsuz, Petrosyan (Kirilov 17), Lapiç, Jdanov (Molla 63), Radniç (Pınzaru 74), A.Kojokar, Belaşa (Aleksanyan 54). Hesab 4:3 "zubrların" xeyrinə olub. Het-trikə imza atan Kirilov komandanın qələbəsində xüsusi pay sahibi olub. Digər topu isə Frantsuz imza atıb. Əvvəlcədən məlum olduğu kimi, təhlükəsizliklərinə təminat verilməyən "Zimbru"nun erməni legionerləri Qalust Petrosyanla Karen Aleksanyan Bakıya gəlməyəcəklər.