HİTSFELD GEDİR???

Deyəsən “Bavariya”da vəziyyət heç də yaxşı deyil. Almaniyanın ən varlı və titullu klubunda bu gedişlə çox  dəyişikliklərə şahid olacayıq. Ötən mövsüm yerli birincilik və çempionatda uğursuzluğa düçar olandan sonra transferə 70 milyon avro xərcləyərək Almaniyada bir ilki gərçəkləşdirən Avropanın 3 qat çempionları buna rəğmən heç də xoş günlər yaşamır. Yayda Luka Toni, Frenk Riberi, Miroslav Klose, Həmid Altıntop kimi ulduzları sıralarına qataraq həm Bundesliqada həm də Avropada çempionluğu hədəfləyən Bakenbauerin komandası çempionatda “Verder”lə ilk iki pilkləni paylaşsa da bunu “Bavariya”ya uğur kimi saymaq olmaz. Yəqin bu səbəbdən komanda daxilində söz-söhbətlər səngimək bilmir. Belə olmasaydı komandanın “generel” ləqəbli baş məşqçisi Ottmar Hitsfeld mövsümün sonunda komandadan ayrılacağını bildirməzdi. Xatırladaq ki, Almaniyanın ən güclü məşqçilərindən sayılan mütəxəssis əvvəllər də “Bavariya”nı çalışdırmış, təxminən 1 il öncə yenidən köhnə klubuna böyük ümidlərlə gətirilmişdir.