I DƏSTƏ: "QARABAĞ-2" GÖYƏZƏN"LƏ SÜLH BAĞLADI...

"Qarabağ-2"(start heyəti)- V.Naumov, F.Xudadatov, Rafiq Əliyev, Ş.Xasaylı, M.Əliyev, Y.Yaqubov, Ə.İsmayılov, F.Hüseynov, O.Bəşirov, R.Qafarlı, Rauf Əliyev. "Qarabağ-2" I dəstədə növbəti oyununu ötən çempionatda yüksək sədtdə çıxış etmiş Qazaxın "Göyəzən" komandasına qarşı keçirdi. Təcrübəli rəqibə qarşı oynamalarına baxmayaraq gənc "Qarabağ"lılar heç də rəqibdən çəkinməyərək gözəl oyun nümayiş etdirdilər. İlk hissədə yaradılmış qol vəziyyətləri də bunu deməyə əsas verir. Ərazi üstünlüyünə malik olan komandamız bu üstünlüyü qola nəticə üstünlüyünə çevirməyi də bacardı. Lakin vurduğu qoldan sonra təcrübəsizlik rəqibin hesabı bərabərləşdirməsinə səbəb oldu ki, sonda komandalar sülhə razı oldular - 1:1. Oyundan sonra Baş Məşqçimiz Elşad Xudadatov oyun haqqında bunları dedi: "Bu oyunda qələbə qazana da bilərdik. Rəqibin titullu olması uşaqları çəkindirmədi və gözəl oyunla bunu sübut etdilər. Yaxşı oyuna görə onlara təşəkkür edirəm. Qarşıdakı oyunlarda da yaxşı oyunla futbolçularım özlərini göstərəcəklər..."