İlk yarımfinalçılar: “Neftçi” və “Qarabağ” ( XALQ QƏZETİ, 22.03.2006)

Dünən futbol üzrə Azərbaycan kuboku yarışlarının dörddəbir final mərhələsinin iki cavab görüşü keçirildi və ilk yarımfinalçılar məlum oldu. Bu hüququ Bakının “Neftçi” və Ağdamın “Qarabağ” komandaları qazandılar. Əgər ilk oyunda “Turan”a üç top üstünlüklə qalib gələn (3:0) “Neftçi”nin ölkənin ən güclü dörd klubu sırasında mübarizəni davam etdirəcəyi heç kimdə şübhə doğurmurdusa, Tofiq Bəhramov adına Respublika stadionunda keçirilən “Bakı” — “Qarabağ” qarşılaşmasından kimin qalib ayrılacağını demək çətin idi. İlk oyunda 3:2 hesabı ilə qələbə qazanan Ağdam klubunu rəqib meydanında cavab görüşündə heç-heçə də qane edirdi. Matçda hesab açlmadı və “Qarabağ” kubokun sahibini mübarizəni dayandırmağa məcbur etdi. Tovuz şəhər stadionunda “Turan” — “Neftçi” qarşılaşmasında da azarkeşlər tribunaları qol görmədən tərk etdilər — 0:0. Digər iki yarımfinalçı bu gün “Xəzər-Lənkəran” — “MKT-Araz” və “İnter” — “Karvan” görüşlərində müəyyənləşəcəkdir. Xatırladaq ki, bu cütlərdə dörddəbir finalın ilk oyunları heç-heçə nəticələnmişdir — müvafiq surətdə 0:0 və 1:1.