LİDERLƏRƏ LAYİQ OYUN . . .

Oyun gözlənildiyi kimi, gərgin başladı. Hər iki komandanın futbolçularının ilk dəqiqələrdən ötürmələrdə səhvlərə yol verməsi onların da həyəcanlı olduqlarının göstəricisi idi. Komandaların heyətində bəzi taktiki və məcburi dəyişikliklər baş vermişdi. Ən böyük itkilər isə komandamızın heyətində idi. Belə ki Azər Məmmədovla Sergey Sokolovun yoxluğunu müdafiəyə böyük zərbə hesab etmək olardı. Lakin təcrübəli Böyükağa Ağayev iki mərkəz yarımmüdafiəçisini - Aslan Kərimov və Romal Hüseynovu cinahlara çəkməklə (Aslan sağ müdafiəçi, Romal isə sol yarımmüdafiəçi qismində) meydan sahiblərinə qarşı fərqli taktiki gediş etdi. Oyunun gedişi Baş Məşqçimizin səhvə yol vermədiyi göstərdi. Əsasən cinahlardan Zaur Tağızadə və Georgiy Adamiyanın keçidlərinə ümid edən meydan sahiblərinin istəyi puç oldu. Bütün oyun boyu heç nə ilə yadda qalmamalarını isə matç sonrası öz baş məşqçilərinin dili ilə desək, onların formada olmamaları deyil, "Qarabağ" müdafiəsinin dəqiq oyunu səbəb oldu... Oyuna gəlincə, ilk hissədə meydanın mərkəzində azacıq ərazi üstünlüyünə yiyələnsə də, meydan sahibləri buradan qabağa gedə bilmədilər. Əksinə, təhlükəli qol vəziyyətləri də komandamız yaratdı. Hissənin sonlarına yaxın Samir Musayevin cərimə zərbəsindən sonra qapıçı çətinliklə topu çərçivədən çıxardı. Az sonra Romal Hüseynovun zərbəsi qapı dirəyindən azacıq aralı keçdi. İkinci hissədə də, Samir Musayev hesabı açmağa çox yaxın oldu. Lakin topu qapıçının başı üzərindən aşırmaq istəyini Miçoviç başa düşdü. Kənan Kərimovun meydana girərək topa ilk toxunuşu da az qala qolla nəticələnəcəkdi. Lakin 3-4 metrlik məsafədən topu düzgün qəbul etməmə sonda təhülükənin yaranmamasına səbəb oldu.Oyunun son dəqiqəsində meydan sahiblərinin oyun boyu yaratdıqları ilk təhlükəli zərbəsinin qarşısını isə Cahangir Həsənzadə ustalıqla ala bildi... Oyun qolsuz bərabərliklə başa çatdı... oyun sonrası MƏTBUAT KONFRANSI