MALDİNİ TİTULLARDAN DOYMUR...

    “Milan”la həm İtaliyada, həm də beynəlxalq arenada çoxlu mükafat qazanan Paola Maldini zəngin titullar kolleksiyasına daha birini əlavə etmək arzusundadır. Komandanın kapitanı tezliklə Yaponiyada start götürəcək klublararası dünya çempionatının qalibi olmaq istəyindədir.

    Italiya millisində 126 oyun keçirərək mütləq rekorda imza atan veteran futbolçu gələcəyə nikbin baxır. Paola dünyanın müxtəlif regionlarından olan ən güclü komandalarına qalib gəlmək istəyini xüsusi vurğulayıb: “Bu turnirin əvvəllər forma geydiyim digər finallarını yaxşı xatırlayıram. Düzünü desəm ilk dəfə belə turnirdə iştirak edərkən yarışın əhəmiyyətini o qədər də anlamırdıq. “Milan” ilk cəhddə azarkeşlərini sevindirsə də, sonradan ardıcıl üç dəfə məğlubiyyət acısı yaşadı. Yenidən bu turnirin iştirakçısı olmağımızla qürur duyuruq. Fikrimcə, klublar arası mundial bu dəfə daha güclü rəqabət meydanına çevriləcək. Ilk növbədə Yaponiyadakı həyat ritmini tutmaq və yeni mühitə tezliklə uyğunlaşmaq lazımdır. Komandamızın uzaq ölkəyə əla formada yollanacağını düşünürəm”.