Matç sonrası: “Hər oyunda hədəfimiz ÜÇ XALDIR”

Oyun sonrası keçirlən mətbuat konfransında sözə ilk olaraq Rasim Kara başladı:
- “Zənnimcə, oyun yetərincə maraqlı oldu. Hər iki tərəf qələbə qazana bilərdi. Amma mənim üçün önəmli olan komandanın göstərdiyi mübarizədir.İlk yarıda daha üstün oynadıq, ikinci hissədə yüksək yerlərə oynayan “Olimpik”in ərazi üstünlüyünü ələ keçirməsi başadüşüləndir. Belə güclü komandayla oyunda gənclərimiz təcrübə qazanır. Onların səhvlər buraxması normaldır. Get-gedə bu problemləri aradan qaldırmağa çalışacağıq. Fikir vermisizsə, hər dəfə bir gəncə şans verərək, ona oynamaq imkanı verirəm. Bu dəfə də Əfran İsmayılov imkandan yararlandı. Onun ilk dəfə əsas komandada çıxış etdiyini nəzərə alsaq, həyəcanlanacağını başa düşmək olar. Oyunumuz göstərir ki, düzgün yoldayıq.”
“Olimpik” məşqçisi Novruz Əzimov “Qarabağ”ın xeyli gücləndiyini bildirdi: “lk dövrəylə müqayisədə “Qarabağ” xeyli güclənib. Gəncləşmiş komanda indi daha əzmkar təsir bağışlayır.”
“Qarabağ”ın ardıcıl iki oyunda iddialıları büdrətməsi jurnalistlərin də diqqətindən qaçmayıb. Bu yöndə veriləm suala Rasim bəy belə cavab verdi: ” Biz sadəcə öz oynumuzu oynayırıq. “Qarabağ” heç kimdən zəif deyil. Biz çempionatda istənilən rəqibi yenməyə qadirik. Ona görə meydanda hansı komanda olursa olsun əsas hədəfimiz 3 xaldır.”