MATÇÖNCƏSI: “XƏZƏR-LƏNKƏRAN” – “QARABAĞ”

Sabah “Qarabağ” Futbol Klubu XVİ milli çempionat çərçivəsində “Xəzər-Lənkəran”la qarşılaşacaq. Ötən ilin çempionu , hal-hazırda lider olan cənublularla matçda komandada əhval-ruhiyyə heç də pis deyil. İlk iki turda acınacaqlı şəkildə məğlub olsaq da komanda artıq uğursuzluq sindromuna son qoymaq istəyir. Rəqibin yetərincə iddialı olması da komandaya əlavə güc verir. Komandamızın yeni transferlərindən İsaac Puponun fikirlərindən də bunu başa düşmək olar. “ İlk oyunda layiq olmadığımız halda məğlub olduq. Amma artıq geriyə yol yoxdur. Bilirəm ki, komandada məndən çox şeylər gözləyirlər. Düzü, mən də özümü göstərə bilməmişəm. Amma inanıram ki, sabah mənim günüm  olacaq”

Üstəlik, cənublulara qarşı komandamızın üstünlüyü də diqqəti cəlb edir. Belə ki, milli çempionatlarda indiyə kimi 10 dəfə qarşılaşsaq da bu oyunların tən yarısında qələbəyə sevinmişik. 4 dəfə isə rəqib meydandan gülərüz ayrılıb. Topların fərqində isə “Xəzər-Lənkəran”ın üstünlüyü diqqəti cəlb edir. 7 dəfə rəqib qapıçısını məyus etsək də qapımızdan 14 top çıxarmağa məcbur olmuşuq. Matç saat 20:00-da keçiriləcək.