MEHMET AK: “KOMANDAMIZ “İNTER”İ YENƏCƏK GÜCDƏDİR”

 “Qarabağ” cari mövsümdə önəmli hədəflərindən olan ölkə kubokunda mühim oyuna çıxacaq. İlk oyunda alınmış 2:2-lik hesabdan sonra komandamız turu qələbəylə keçməyi düşünür. Artıq bütün kollektiv bu matça diqqətini bütünləşdirib.

Şübhəsiz, “İnter” matçından öncə komanda daxili abu-havanı “Qarabağ” Futbol Klubunun fiziki hazırlıq üzrə koordinatoru Mehmet Akdan yaxşı bilən az olar. Mehmet bəydən bu önəmli matç öncəsi fikirlərini öyrənmək maraqlı olardı. Gənç mütəxəssis yetərincə iddialı danışdı:” İkinci dövrəyə pis başlamamışıq. Hələlik, məğlubiyyətin nə olduğunu bilmirik. Bu bizim doğru yolda olduğumuzu göstərir. Bütün oyunlara qalib gəlmək üçün çıxırıq. Rəqibin kimliyindən asılı olmayaraq.”

Əlbəttə, Mehmet bəy “İnter” matçına toxunmaya bilməzdi:” “İnter”i ikinci yarının başlanmasından etibarən izləyirik. Zənnimizcə, rəqibi yetərincə analiz edə bilmişik. İlk oyunda bir qədər şanssızlıqla üzləşdik. Xoş olmayan qollar buraxdıq. Amma cavab görüşündə qələbə qazanacağımıza inanırıq. Yetər ki, futbolçularımız öz inanclarını meydana qoysunlar. Təbii ki, “İnter”in gücünü bilirik. Amma, bu o demək deyil ki, biz yarımfinal haqqında düşünmürük. “Masallı” ilə oyunda kubok görüşünü də düşünürdük. Artıq, hədəfimiz bəllidir. “İnter”i məğlub edib yolumuza davam etmək.”

Türkiyəli  mütəxəssis azarkeşləri də unutmadı: ” Şəfa” stadionunda necə deyərlər, pas vermək olur. Bizim komandamız da topla oynamağı sevir. Ona görə də görüşü izləyənlər zövqlü mücadilə izləyəcəyini deyə bilərik. Amma, inşallah, sonda bizim azarkeşlər sevinər.”