Mətbuat konfransları və açıq məşqlərin vaxtları müəyyənləşdi

UEFA Avropa Liqasının pley-off mərhələsinin cavab oyunları çərçivəsində keçiriləcək "Qarabağ" - "Braqa” (Portuqaliya) matçından öncə təşkil ediləcək mətbuat konfransları və media nümayəndələri üçün açıq məşqlərin vaxtları məlum olub.

Komandamızın baş məşqçisi Qurban Qurbanovun iştirakı ilə keçiriləcək mətbuat konfransı fevralın 21-də saat 13:00-da Tofiq Bəhramov adına Respublika stadionunda baş tutacaq. 17:30-da isə media nümayəndələri üçün açıq məşq (ilk 15 dəqiqə) “Azersun Arena”da keçiriləcək.

Qonaq komandanın Tofiq Bəhramov adına Respublika stadionunda təşkil olunacaq mətbuat konfransı saat 20:30-da start götürəcək. Portuqaliya təmsilçisinin eyni arenada keçiriləcək ilk 15 dəqiqəsi açıq olacaq məşqi 21:30-da başlayacaq.

Media mənsubları media biletlərini və akkreditasiyalarını fevralın 21-i saat 10:30-dan 12:30-dək Tofiq Bəhramov adına Respublika stadionunun media mərkəzindən götürə bilərlər.

Qeyd edək ki, fevralın 22-də keçiriləcək “Qarabağ” – “Braqa” görüşü saat 21:45-də başlayacaq.