MİLLİMİZ ERMƏNİSTANI DARMADAĞIN ETDİ... 9:1

Dünən Çexiyanın Xrudim şəhərində keçirilən futzal üzrə dünya çempionatının seçmə mərhələsində iştirak edən Azərbaycan millisi Bakı vaxtı ilə 20:30-da “Zimni stadion” İdman kompleksində ilk oyuna çıxıb. Bu qarşılaşmada komandamızın rəqibi Ermənistan millisi olub. Qeyd edək ki, Azərbaycan dünən  9-cu dəfə Ermənistanla üz-üzə gəlib. 7-si futbol və 1-i futzal olmaqla indiyə qədər keçirdiyimiz oyunların heç birində bədnam qonşularımıza yenilməmişik.  Elə ilk dəqiqələrdən üstünlüyə ələ alan millimiz rəqiblərə heç bir şans verməyib. Oyuna fəal başlayan komandamız erkən fərqlənməyə nail olub. Lakin rəqib komanda tezliklə tarazlığı bərpa edib. Fasiləyədək hesabda yenidən irəliyə çıxan millimiz fasilədən sonra rəqiblərə heç bir şans tanımayıb. Ermənistan millisi düz 7 dəfə oyuna mərkəzdən başlamağa məcbur olub.  Prinsipial əhəmiyyət daşıyan matç Azərbaycan millisinin böyük hesablı qələbəsi ilə başa çatıb. Andrey Yudinin yetirmələri rəqibi 9:1 hesabı ilə darmadağın ediblər. Qeyd edək ki, komandamızın növbəti rəqibi Finlandiya millisi olacaq. Bu qarşılaşma Bakı vaxtı ilə saat 20:30 başlayacaq.