MÜKƏMMƏL DÖNÜŞ...

"QARABAĞ" 3 - 1 "ABN BƏRDƏ"

Bu da qələbə. 3:1. Amma hesab sizi aldatmasın. Çünki, 90 dəqiqə meydanda aparılan mübarizə və vurulmayan qolları nəzərə alsaq hesab bəlkə də 8:1, 9:1 olamlıydı. Amma, axır ki, şeytanın qıçının qırıldığını nəzərə alsaq (özüdə mübarək Ramazan ayının ilk günlərində ), qələbəni qeyd etmək olar.

Matçöncəsi, komandamız iki itki ilə qarşılaşmışdı. Timur İsrafilovun oynamayacağı əvvəlcədən bəlli idisə, Murad Ağakişiyevin həftəiçi səhhətlə bağlı problem yaşaması onu 18 nəfərlik siyahıdan kənar salmışdı.

Bundan başqa baş məşqçi Rasim Kara Azər Məmmədovu yarımmüdafiədə oynadaraq bir yenilik etmişdi. Aftandil Hacıyev komandamızda ilk dəfə start heyətində yer alması, Aslan və Qoqanın orta sahənin önünə, Puponun Vaqiflə Kənanın arxasında qərarlaşmasına səbəb olmuşdu.

Oyun komandamızın hücumları ilə başladı. İlk öncə Qoqanın ötürməsinə heç kim çatmadı. 8-ci dəqiqədə Vaqif müdafiəçilərin səhvindən sonra qapıçı ilə 1 metrlikdə qalsa da qapını dəqiq nişan ala bilmədi. Az sonra Cavadov özü dəqiq ötürmə verə bilmədi. 28-ci dəqiqədə top qapıçını da keçsə də Puponun zərbəsinə qolkiper özünü yetirə bildi. İlk yarının qalan vaxtı da üstünlüyümüzlə keçsə də, hesab açılmadı. Buna qədər isə komandamızda 1 əvəzetmə olmuşdu. Qoqanın zədələnməsi nəticəsində Viktor oyuna daxil oldu ki, afrikalı sonradan ona edilən etimadı doğruldacaqdı.

İkinci yarıya hücumlarla başlayan komandamız qola sevinməsi üçün cəmi 5 dəqiqə lazım oldu. Vaqif cərimə meydançası daxilində topu qəbul edib 2 futbolçunu keçərək qarşısıalınmaz zərbə vurdu.1:0. Xatırladaq ki, komandamızın son qoluna da ötən mövsümün son turunda “MKT-Araz”la oyunda Cavadov imza atmışdı.

Elə növbəti qol üçün də 5 dəqiqə lazım oldu. Bu dəfə oyuna uğurla daxil olmuş Viktor matçın ən yaxşısı olan Puponun ötürməsindən sonra boş qapını nişanladı. Lakin qonaqlar topu mərkəzdən başlayaraq, Xalid Muradovla hesab arasındakı fərqi azaltdı. Amma həmin gün “Qarabağ”ı saxlamaq mümkün deyildi. 71-ci dəqiqədə Vaqif yenə ustalığını göstərərək hesab arasındakı fərqi 2-yə çatdırdı. Buna qədər isə, Viktorun baş zərbəsi dirəyə dəymiş, Əfranın zərbəsini isə qapıçı barmaqlarının ucu ilə dəf etmişdi. 80-ci dəqiqədə isə komandamız azlıqda qaldı. Hakim Ayxan Abbasova heç kimin gözləmədiyi halda qırmızı vərəqə verərək meydandan kənarlaşdırdı. Azlıqda qalmasına rağmən komandamız hesabı 2 dəfə dəyişə bilərdi. Öncə, kapitan Aslan mükəmməl texnikayla bir-neçə futbolçudan sıyrılsa da zərbəsi alınmadı. Əlavə olunmuş dəqiqələrdə isə Puponun 5 metrdən zərbəsi qapıya düşmədi. Beləliklə, komandamız cari mövsümdəki, ilk 3 xalını 3 qolla qazandı.  

 Oyundan fotolara aşağıdakı linkə daxil olmaqla baxa bilərsiniz:

Fotoqalereya: "QARABAĞ" 3 - 1 "ABN Bərdə"
Yaxın vaxtlarda oyunda vurulmuş qollara canlı baxmaq şansı qazanacaqsınız. Xəbərləri izləməkdə davam edin...