OYUN ÖNCƏSİ: LƏNKƏRAN SINAĞI . . .

"Qarabağ" Futbol Klubu Ölkə Çempionatının növbəti - XI turunun oyununu səfərdə Lənkəranın "Xəzər L." komandasına qarşı keçirəcək. "Gənclərbirliyi" ilə son turun oyunundan sonra bir günlük istirahət edən komanda bütün diqqətləri liderə qarşı keçirəcəyi oyuna yönəldib. Heyətlə bağlı itkilərə gəlincə, son turda qırmızı vərəqə almış Sergey Sokolov bu oyunda iştirak edə bilməyəcək. Əvəzində zədədən əziyyət çəkən Slobodan Sladoyeviçin bu tur meydana çıxmaq şansları yüksəkdir. Oyuna bir gün qalmış Lənkərana yollanacaq komanda Lənkəran Şəhər stadionunda son məşqini edərək, oyun saatını gözləyəcək. Oyun öncəsi komandanın düşərgəsində yüksək ab-hava hökm sürür. Futbolçular Lənkəran səfərində də məğlubiyyətsizlik seriyasını davam etdirmək üçün iddialıdırlar. Bunu onlarla söhbətdən də sezmək mümkündür: Azər Məmmədov: "Liderlə oyun hər zaman çətin olur. Rəqibimiz hal-hazırda zirvədədir və öz dəsti xətti var. Hər iki komandanın qol imkanları olacaq ki, bu imkandan maksimum yararlanan qalib gələcək. Biz müdafiəçilərin əsas məqsədi səhv etməməkdir..." Aslan Kərimov: "Ağır oyun olacağını proqnozlaşdırmaq elə də çətin deyil. Rəqibimizin bu tur öncəsi lider olması güclü rəqib olduqlarının bir sübutudur. Yaxşı futbolçuları var. Azarkeşlərin gözəl futbol seyr edəcəklərinə inanıram..." Ramal Hüseynov: "Xəzər Lənkəran" komandası bu il iddiasını daha da artırıb. Çempionatda yalnız bir məğlubiyyətləri var. Biz hələ ki, çempionatda sabit oyunumuzu tapmasaq da, güclü rəqiblərlə oyunda üstün tərəf biz oluruq. Bu turda qalib gəlmək üçün bütün qüvvəmizi səfərbər edəcəyik..." Samir Musayev: "Son oyunlarda qol vura bilmirəm. Bu bəlkə də komandamızın yaxşı oyun göstərə bilməməyindən irəli gəlir. Bu oyun hücumçuların günü olmalıdır ki, bizim qollar komandamızın qələbəsinə töhvə verməlidir. Mən Lənkərandan qələbə ilə dönəcəyimizə inanıram! " Xatırladaq ki, oyun 09.11.2006-cı il tarixində saat 16:00-da start götürəcək. Komandamıza bu oyunda uğurlar arzulayırıq !