“QARABAĞ-2” 2-Cİ YERƏ YÜKSƏLDİ

Belə getsə, biz hələ “Qarabağ-2” haqqında çox danışacağıq. Yaşar Hüseynovun yetirmələri növbəti qələbə ilə artıq qərarlaşdığı qrupda 2-ci sıraya yüksəldi. Buzovna stadionunda baş tutan matçda 2-ci turdan təxirə salınmış görüşdə “Ədliyyə”ni qəbul edən komandamız 3-cü görüşdə 2-ci qələbəsini qazanaraq NBC-nin ardından 2-ci sıraya yüksəlib.

Lakin matç gənclərimiz üçün yaxşı başlamayıb. İlk yarıda yenik duruma düşən “Qarabağ-2” ikinci hissədə “Ədliyyə”ni təmamilə öz yarımhissələrinə çəkilməyə məcbur edərək, 2 dəfə qola seviniblər. Öncə Fərrux İsmayılovun cərimə meydançasına etdiyi ötürmə zamanı Emin Mustafyev başla topu qəbul edərək elə başla da tora göndərdi. Aramsız hüçumlara davam edən gənclər, 83-cü dəqiqədə istəklərinə çatdılar. Meydana sonradan daxil olaraq komandanın oyununu xeyli canlandırmış İsabala İsrafilovun ötürməsini Röyal Nəcəfov başla  dəqiq tamamladı. Görüşün sonuna yaxın daha 2 dəfə fərqlənmə şansı əldə etdik. Lakin Rza Qafarlı və Sabir Lotov imkanlarından istifadə edə bilmədilər.