"QARABAĞ-2" DARMADAĞIN ETDİ

AFFA-nın təşkilatçılığı ilə keçirilən Bakı birinciliyi davam edir. Artıq qrup oyunları başa çatmaq üzrədir.  Yarışda ən böyük favoritlərdən sayılan “Qarabağ-2” kollektivi titula doğru  inamla addımlayır. Gənclərimiz qrup mərhələsinin sondan öncəki turda “Neftçi”dən olan həmkarlarıyla qarşılaşıb. Görüş Yaşar Hüseynovun yetirmələrinin üstünlüyü ilə keçib. Daha dəqiq desək, gənclər rəqibə göz açmağa imkan verməyib. Rəqibə bir dəfə qol sevinci yaşamağa imkan verən “Qarabağ-2” buna görə onları peşiman edib. Hüseynovun tələbələri düz 6 dəfə rəqibi meydanın mərkəzinə dəvət edib. . Komandamızda qolları Aqşin Mehdiyev (2), Bayram Kərimov,  Natiq Kərimi, Röyal Nəcəfov, Mehran Əliyev adına yazılıb.  Belədə komandamız liderliyini qoruyub.

Xatırladaq ki,  “Qarabağ-2” qrup mərhələsində sonuncu matçı iyunun 15-i keçirəcək.  “Bayıl Rovers”lə keçiriləcək oyunun nəticəsindən asılı olmayaraq komandamız play-off mərhələsinə vəsiqəni artıq  əldə edib.