“QARABAĞ-2” YARIMFİNALDA

Xəbər verdiyimiz kimi, “Qarabağ”ın gənclərdən ibarət komandası AFFA-nın təşkil etdiyi Bakı birinciliyində mübarizə aparır. Artıq qrup oyunları başa çatıb. Sonuncu turda Yaşar Hüseynovun yetirmələri “Bayıl Rovers”lə qarşılaşıb. Gənclərimiz yenə də rəqibi darmadağınla razılaşmağa məcbur edib. Demək olar ki, ilk yarıda görüşün taleyi müəyyənləşib. Samir Əliyev, Sabir Lotov, Röyal Nəcəfovun (2) vurduğu qollar qarşılaşmanın taleyini həll edib, 4:0. İkinci yarıda rəqibinə bir qədər oynamağa imkan yaradan “Qarabağ-2” rəqibin 2 dəfə qol sevinci yaşamasına imkan versə də rəqibdən bir dənə artıq qol vurmaq problem olmayıb. Yasin Yaqubov, Elgiz Kərəmli və Natiq Kərəmi hesabı 7:2-yə çatdırıb.

Beləliklə, qrupu lider olaraq bitirən Hüseynovun yetirmələri yarımfinala vəsiqə qazanıb. Bu mərhələdə “Atəşgah”la qarşılaşacaq komandamız ilk görüşü 22-si cavab görüşü isə 26-sı keçirəcək. Final isə İyunun 29-u baş tutacaq.