“Qarabağ" AFFA-ya şikayət etməkdən bezib (HET-TRİK, 13.03.2006)

"Bakı" - "Qarabağ" oyununda baş hakim Babək Quliyevin qarşılaşmanı aşağı səviyyədə idarə etməsi ağdamlıların açıq-aşkar narazılığına səbəb oldu. Amma nədənsə qonaq komanda bunu matçın protokolunda qeyd etmədi. Hakimliklə bağlı rəsmi fikir öyrənmək üçün "Qarabağ"ın icraçı direktoru Əmrah Çəlikəllə əlaqə saxladıq. Əmrah bəy isə baş hakimin oyunu idarə etməsinə qiymət verməyimizi istədi: "Yəqin siz də baxdınız. Gördünüz ki, "Qarabağ" necə oyun oynadı. Hakimin onlara necə kömək etdiyini də gördünüz. Yəni burada danışılası bir şey yoxdur. Üç yaşında uşağı da aparsanız, hakimliyin səviyyəsi ilə bağlı öz fikirlərini deyə bilər". Əmrah Çəlikəl hakimlərdən AFFA-ya şikayət etməkdən yorulduğunu bildirdi: "İndiyə kimi çox şikayət etmişik. Yazmışıq da, pozmuşuq da, amma heç bir xeyri olmayıb". O, bizdən "Qarabağ"a qarşı edilən haqsızlıqları işıqlındırmağı xahiş etdi: "Mətbuatdan xahişim budur ki, hakimliyin aşağı səviyyədə olmasını işıqlandırasınız. Əgər hakim bizə də kömək edirsə, bunu yazmağınızı xahiş edirəm. Artıq bizim yazmağımızdan keçib. İki dəfə Vüsal Əliyevdən yazdıq, bir şey çıxmadı".