“Qarabağ” – “Bayer” oyununda bir qol

“Qarabağ” – “Bayer” – 0:1
Viktor Bonifeys, 90+3 (pen.)

UEFA Avropa Liqasının qrup mərhələsində mübarizə aparan “Qarabağ” növbəti oyununu keçirib. Qurban Qurbanovun yetirmələri IV turda “Bayer”lə üz-üzə gəlib. H qrupunun liderlərinin görüşü Tofiq Bəhramov adına Respublika stadionunda baş tutub.

Komandalar arasında iki həftə əvvəl Leverkuzendə keçirilən qarşılaşma ilə müqayisədə “Qarabağ”ın start heyətində iki dəyişiklik olub. Marko Veşoviç və Yassin Benzia ilk dəqiqələrdən meydana çıxıblar. Onlar 
Mateus Silva və Toral Bayramov əvəzləyiblər.

Rəqiblər oyuna kəşfiyyatla başlayıblar. Qonaqlar topa nəzarəti ələ almağa çalışsalar da, “Qarabağ” buna imkan verməyib. Qarşılıqlı hücumlarla davam edən ilk yarının əvvəlində Yassin Benzianın zərbələri yaddaqalan olub. Abdullah Zubirlə Leandro Andradenin qapı önünə ötürmələrini qapamağa rəqib imkan verməyib. Almaniyalıların hücumlarının qarşısını inamla alan müdafiə xəttimizlə yanaşı, bir neçə epizodda oyuna daxil olan Andrey Lunyov da etibarlı oynayıb. Künc zərbəsi zamanı İnkapyenin qapıya göndərdiyi topu da rusiyalı qolkiper dəf edib. Hissənin sonlarında “Qarabağ” hesabı açmaq üçün imkanlar qazanıb. Qapıçı və müdafiəçilər arasında anlaşılmazlıqdan sonra Yassin Benzia və Olavio Juninyo topla istənilən kimi toxunuş edə bilməyiblər. Misli Premyer Liqasının bombardiri fasiləyədək çərçivəyə iki yaddaqalan zərbə endirsə də, rəqib qolkiper səhvsiz oynayıb.

Fasilədən sonra da matçın ssenarisi dəyişməyib. Almaniya klubunun cüzi üstünlüyünə baxmayaraq, görüş qarşılıqlı hücumlarla davam edib. Hər iki tərəf müdafiədə etibarlı oyunu ilə seçilib. Bu üzdən real qol vəziyyətləri də az olub. Hissənin ortalarında Elvin Cəfərquliyev yaxın məsafədən başla zərbə endirsə də, top qapının üstündən keçib. Olavio Juninyonun cərimə meydanı daxilindən qapını nişan aldığı epizodda top Abdullah Zubirə tuş gəlib. “Bayer”in təhlükəli hücumu isə Andrey Lunyovun seyvi ilə nəticələnib. Yassin Benzia da əlverişli imkandan yararlana bilməyib. Matçın sonlarında isə qonaqlar fəallığı artırıblar. Andrey Lunyov epizodların birində dizindən zədələndiyi üçün meydanı tərk edib. Almaniya klubunun hücumları uzatma dəqiqələrindəki penalti ilə yekunlaşıb. Viktor Bonifeys bu imkandan yararlanmaqla komandasına qələbə qazandırıb. Beləliklə, “Qarabağ” ev oyununda 0:1 hesabı ilə məğlub olub.

Qeyd edək ki, qrupun bu gün keçiriləcək digər oyununda “Hekken” və “Molde” üz-üzə gələcək. Bu matç Bakı vaxtı ilə saat 00:00-da başlayacaq.