"QARABAĞ" ÇOX AXTARDI, ABDULLAYEVİ TAPDI (HET-TRİK, 12.07.2005)

Mövsümlərarası fasilədə demək olar ki, bütün klublarımız heyətlərini gücləndirmək, daha təcrübəli məşqçi və futbolçularla sıralarını möhkəmləndirmək istiqamətində fəaliyyət göstərirlər. Uzun zamandır ki, baş məşqçi axtarışında olan "Qarabağ" da bu baxımdan istisna deyil. Xeyli vaxtdır ki, Türkiyədən çalışdırıcı gətirəcəyi, daha sonra isə müvəqqəti olaraq Səttar Əliyevlə anlaşdığı söylənilən "Qarabağ" qəzetimiz tərəfindən eksklüziv olaraq əldə edilən məlumatlara görə, Elxan Abdullayevlə razılığa gəlib. Klub toplantısı keçirən "Qarabağ"ın Vitse-Prezidenti Taher Gözelin təkidi ilə Elxan Abdullayev komandanın baş məşqçisi təyin edilib. Xatırladaq ki, ötən mövsümə "Bakı"nın sükanı arxasında başlayan Abdullayevin bu klubdakı fəaliyyəti uğursuz alındı.Çempionatın ilk turundaca məhz "Qarabağ"la qarşılaşmada məğlubiyyətə uğrayan "Bakı" çalışdırıcısı ilə yollarını ayırmalı oldu. Hadisələrin sonrakı inkşafı Elxan Abdullayevin "Qarabağ"da ikinci məşqçi postunu tutması ilə nəticələndi. K.A.Torres dönəmindən üzü bəri Elxan bəy eyni zamanda millinin məşqçilər korpusunda yer alır və braziliyalı çalışdırıcısının köməkçisi vəzifəsini icra edirdi. "Qarabağ"dan aldığımız digər xəbərlərə görə komanda dünən Səttar Əliyevin nəzarəti altında məşqlərinə başlayıb. Hələ konkter bir söz söylənilməsə də, Ağdam klubunda seleksiya işlərinin də getdiyi, həftə sonuna qədər yeni legionerlərin baxışa gələcəyi bildirilir. Bundan əlavə komandanın düşərgəsində 15-ə yaxın futbolçunun toplaşdığı və onların dördünün legioner olduğu söylənilir.