`Qarabağ` hazırlıqlarına davam etsə də...

`Qarabağ`ımız hazırlıqlarını davam etdirir. `Honka`yla cavab oyunundan sonra 2 günlük komandamıza istirahət verən baş məşqçimiz Qurban Qurbanovun başçılığı altında yenidən tam sürətlə çalışmalarını davam etdirir. Lakin komandamız heç də tam heyətlə məşq edə bilmir. Belə ki, əsas millinin düşərgəsində olan Fərhad Vəliyev, Rəşad Sadıqov, Elnur Allahverdiyev, Vüqar Nadirov, Vaqif Cavadov, Elvin Məmmədovla yanaşı U-21-lə birgə olan Rauf Əliyev, Maksim Medvedev, Əfran İsmayılov Almaniyadadır. Qara Qarayev də U-19-un düşərgəsindədir. Admir Teli 2 günlük istirahətdən sonra vətənindən dönsə də, Emin İmaməliyevin zədəsi davam edir. Amma Eminin durumunda düzəlmə davam edir. Yarımmüdafiəçinin hətta `Tvente`ylə ilk matca yetişmə ehtimalı da var.

Komandamızın Avroliqadakı cavab macının saatı bəlli olub. Oyun saat 20:00-keçiriləcək. İlk oyun üçün isə böyük ehtimalla komandamız 18-i  Hollandiyaya yollanacaq.