"QARABAĞ" MOLDOVADA . . .

"Qarabağ" Futbol Klubu hazırlığın ikinci mərhələsini başa vurdu... Türkiyənin Qəzılcahamam şəhərinin "Patalya" otelində 14 günlük təlim məşq prosesi başa çatdı. Bu mərhələ hazırlıq səviyyəsini yoxlamaq məqsədi daşıdığından əsasən yoldaşlıq görüşlərinə üstünlük verildi.Nəticəni də qənaətbəxş saymaq olar. Türkiyə superligasında mücadilə edən klublara qarşı oyunlarda komandamız bir qələbə, bir heç-heçə edərək bir oyundan məğlub ayrıldı... Bu gün isə "Qarabağ" FK UEFA Kubokunun ilkin təsnifat mərhələsində ilk oyununu keçirəcək Moldova Respublikasına gəldi. Xatırladaq ki, komandamız püşkatma nəticəsində məhz "Zimbru" ilə ilk oyunu 13.07.2006-cı il tarixində Kişinyov şəhərində keçirməlidir. Səhər saatlarında Kişinyova çatan klub üzvləri şəhərin ən yaxşı oteli sayılan beş ulduzlu "LEO GRAND" mehmanxanasında məskunlaşdı. Axşam 20:00-da Moldovada ilk məşqinə çıxacaq komanda gündəlik bir dəfəlik yüngül məşqlərlə vacib oyuna hazırlaşacaq. Axşam məşqindən sonra isə Baş Məşqçi Böyükağa Ağayev rəqibin bir neçə gün öncə keçirdiyi çempionat oyununa baxış keçirəcək. Xatırladaq ki, Baş Məşqçimiz "Zimbru" - "Dacia" matçına baxmaq üçün Kişinyova komandadan bir neçə gün öncə gəlmişdir.