"QARABAĞ" NÖVBƏTİ OYUNA HAZIRLAŞIR . . .

"Qarabağ" Futbol Klubu növbəti turda hər zaman böyük maraqla gözlənilən son ölkə çempionu "Neftçi" ilə matça hazırlıqlarını davam etdirir. Baş məşqçi Elxan Abdullayevin Millinin heyətinə Albaniyada olması səbəbindən klub məşqləri Səttar Əliyev keçirir. Dünən komanda ikitərəfli matç keçirdi. Şərti olaraq "A" və "B" komandalar adlandırılan matçda məşqçi müxtəlif variasiyalarla heyətə baxış keçirdi. Oyun klubda yüksək əhval ruhiyyənin olduğunu bir daha sübut etdi. Bütün xətlərdə futbolçular gözəl, ən əsası baxımlı oyun sərgiləyərək, matçı izləyənlərə zövqlü anlar yaşatdılar. Qeyd edək ki, matç 3:1 hesabı ilə "A" komandasının xeyrinə başa çatdı. Qolları "A" komandasından Aleksandr Voskoboynik və iki dəfə Samir Musayev, "B" komandasından isə Tərlan Mahmudov keçirdi. Baş məşqçi Elxan Abdullayev komandaya bu gün qoşulacaq.