"QARABAĞ" "SÜLH" BAĞLADI (FUTBOL DÜNYASI, 10.10.2006)

Milli komandamızın Avropa çempionatının seçmə mərhələsi çərçivəsindəki oyunları ilə əlaqədar yaranmış fasilədən istifadə edən bəzi klublarımızın baş məşqçiləri yoxlama-sınaq matçı keçirməklə heyətdəki boşluqları ortaya çıxarmağa çalışır. Bir neçə gün əvvəl ikinci komandasını 7:1 hesaı ilə məğlub edən "Qarabağ" dünən "Gənclərbirliyi"ni sınağa çəkib. Əfqan Talıbovun gedişindən sonra ilk dəfə meydana baş məşqçisiz çıxan Sumqayıt təmsilçisi ilk yarını Zaur Əsədovun qolundan sonra qalib başa vurub - 0:1. İkinci hissədə Ağdam təmsilçisi Kənan Kərimovla hesabı bərabərləşdirib və qarşılaşma 1:1 hesabı ilə sona çatıb. Sumqayıt klubunun vitse-prezidenti Vaqif Cavadovdan aldığımız məlumata görə, "Gənclərbirliyi"nin çalışdırıcı probleminin bu həftənin sonuna qədər həll edilməsi nəzərdə tutulub.