"QARABAĞ" TƏLİM MƏŞQ TOPLANIŞINDA ...

Avropa Çempionatının Seçmə Mərhələsi çərçivəsində Milli komandamızın oyunları ilə əlaqədar Ölkə Çempionatda fasilə yaranmışdır. Bu fasilədən maksimum yararlanmaq üçün "Qarabağ" Futbol Klubu Təlim Məşq toplanışına yığıldılar. 05.10.2006-cı il tarixindən başlayan təlim məşq prosesi 10 gün müddətinə davam edəcək. Gündəlik iki dəfəlik məşqlər edəcək komanda, 2-3 yoldaşlıq oyunu keçirməyi də planlaşdırır. İlk oyun 06.10.06 tarixində birinci dəstə təmsilçimiz "Qarabağ-2" ilə keçiriləcək. Oyun FŞM stadionunda keçiriləcək. Digər rəqiblərlə danışıqlar başa çatmadığından, rəqibin kimliyi hələ dəqiqləşməmişdir. Heyətlə bağlı problemlər öz həllini tapmaqdadır. Azər Məmmədov və İrakli Beraya tam gücü ilə komandanın məşqlərində iştirak edir. "Neftçi" ilə oyundan sonra zədələnən Slobodan Sladoyeviç də komandanın məşqlərinə qoşulmuşdur. Komandanın heyətində yalnız millinin heyətinə cəlb olunmuş dörd futbolçu - Cahangir Həsənzadə, Sergey Sokolov, Aslan Kərimov və Samir Musayev, eləcə də 2 ay öncə əməliyyat olunmuş,hal hazırda fərdi məşqlər edən Qoqa Beraya iştirak etmir. Qoqanın əməliyyatla bağlı heç bir problemi yoxdur və futbolçumuz sadəcə bərpa prosesini keçməlidir... Birinci dəstə təmsilçimiz "Qarabağ-2" isə əsas diqqətini bazar günü keçirəcəyi "Qaradağ"la oyuna yönəltmişdir. Oyun saat 17:00-da "Şəfa" stadionunda keçiriləcək.