"QARABAĞ" UŞAQ FUTBOLUNUN İNKŞAFINA ÇALIŞIR.(ÜÇ NÖQTƏ, 08.03.2005)

Çempionluğa iddialı Ağdamın "Qarabağ" komandası uşaq futbolunun inkişafına xüsusi yer verir. Klub bütün yaş qrupları üzrə uşaq futbolunu inkişaf etdirmək niyyətindədir. Təsadüfi deyil ki, bununla əlaqədar "Qarabağ"ın rəhbərliyi uşaq futbolu üzrə türkiyəli mütəxəssis Hamdi Serpil Tüzünü Azərbaycana dəvət edib. Qeyd edək ki, Tüzün Türkiyə futboluna Rza Çalınbay, Okan Buruk, Əmrə Aşık, Fatih Təkkə, Oktay Dərəlioğlu, Yıldıray Baştürk kimi oyunçuları bəxş edib. Uşaq futbolunu inkişaf etdirmək üçün "Qarabağ" komandası müsabiqə elan edib. Müsabiqədə 1987-92-ci il təvəllüdlü istedadlı gənclər iştirak edə bilərlər. Müsabiqənin qalibləri klubun uşaq futboluna cəlb olunacaq. Müsabiqədə iştirak etmək istəyən gənclər martın 11-nə qədər "Şəfa" stadionunda qeydiyyatdan keçməlidirlər. Onlar martın 12-13-də müsabiqədə iştirak etmək şansı qazanacaqlar. İlk olaraq Bakıda keçiriləcək bu müsabiqə yaxın zamanlarda bölgələri də əhatə edəcək. Müsabiqəni keçirməkdə əsas məqsəd Azərbaycanda uşaq futbolunun tərəqqisinə təkan verməkdir.