“Qarabağ” və “Hekken” akademiyalarının nümayəndələri arasında görüş keçirildi

UEFA Avropa Liqasının qrup mərhələsinin II turunun “Hekken” (İsveç) – “Qarabağ” oyununa (0:1) yollanan nümayəndə heyətimizdə yer alan futbol akademiyamızın koordinatoru Aftandil Hacıyev Hoteborq şəhərində işgüzar görüşlər keçirib. Mütəxəssis “Hekken” klubunun bazasında olub, akademiyanın rəhbərliyi, məşqçiləri, həmçinin məşhur “Gothia Cup” turnirinin təşkilatçıları ilə görüşüb.

Təcrübəli mütəxəssis “Gothia Cup” turnirinin direktoru Niklas Andersson və akademiyanın baş məşqçisi Anders Uarnberqin iştirak etdiyi görüşlərin səmərəli olduğu qənaətindədir: “Əsas məqsədimiz “Gothia Cup” turniri barədə məlumat toplamaq idi. Bunu Bakıda klub rəhbərliyi ilə müzakirə edəcəyik. Gələcəkdə iştirakçılar sırasına qoşulmaq niyyətimiz var. Təklif olunan paketi müzakirə etdikdən sonra iştirakla bağlı qərar veriləcək. Gələcəkdə bir neçə yaş qrupumuzun burada iştirakı planlaşdırılır”.

“Hekken” klubunun təşkilatçılığı ilə 1975-ci ildən keçirilən “Gothia Cup” yeniyetmələrin dünya kuboku kimi tanınır. Hacıyev 11-19 yaş arası oğlan və qızlardan ibarət 1800-ə yaxın komandanın mübarizə apardığı turnirə qatılmanın faydasını vurğulayıb: “Turnirin keyfiyyəti və reytinqi çox yüksəkdir. Buradakı iştirakçılar müxtəlif ölkələrdən təşrif buyurur. 110 meydançada müxtəlif yaş qruplarından olan 1800-ə yaxın komanda mübarizə aparır. “Gothia Cup”a qatılsaq, bu, Azərbaycan akademiyaları arasında bir ilk olar. Bu turnir bizim futbolçularımıza çox fayda verə bilər. Çox istərdik ki oyunçularımız belə bir yarışda təcrübə qazansınlar”.

Mütəxəssis İsveç klubu ilə başlayacağı gözlənilən əməkdaşlığın daha da genişlənmə perspektivini də qeyd edib: “Görüşdə futbol baxımından çox önəmli olan bir sıra digər mövzulara da toxunuldu. Akademiyanın iş prinsipi ilə tanış olanda bəzi yeniliklər də gördük. Bu təcrübədən faydalana bilərik. “Hekken”lə gələcək əməkdaşlıq barədə düşünəcəyik. Bu, “Gothia Cup” ilə başlayacaq. Sonra bir neçə futbolçunun skautlar tərəfindən izlənilməsi də mümkündür. Akademiyanın məşqçiləri ilə də görüşdük. Gələcəkdə onların təcrübəsindən faydalanmaq mümkündür”.

Qeyd edək ki, Xabi Alonso, Emmanuel Adebayor, Julio Baptista, Yassin Bunu, Zlatan İbrahimoviç, Alan Şirer, Andrea Pirlo, Ze Roberto kimi ulduzlar vaxtilə “Gothia Cup” turnirinin iştirakçısı olub.