"Qarabağ" yenidən liderdir(525-Cİ QƏZET, 11.05.2005)

Futbol üzrə milli çempionatın 31-ci turuna srağagün start verilib. Həmin gün "Turan" paytaxtda "Karat"ın qonağı olub. Tovuzlular üstün oyun nümayiş etdirərək qələbə qazanıblar. "Karat" qonaqların 3 qolundan yalnız birinin əvəzini çıxa bilib. Dünən isə 31-cu turun daha üç oyunu gerçəkləşib. Sensasiyasız ötüşən matçların hamısında meydan sahibləri qalib gəliblər. Suraxanı qəsəbə stadionunda "Qarabağ" "Şahdağ-Samur"u qəbul edib. Çoxları bu matçda Ağdam klubunun büdrəyəcəyini gözləyirdi. Çünki 3 gün öncə çempionluğa iddialı sayılan "Bakı" "Şahdağ-Samur"dan cəmi bir xal qopara bilmişdi. Qusarlıların "Qarabağ"a əngəl törətməyə gücü kifayət etməyib. "Şahdağ-Samur"un ciddi müqavimətilə rastlaşan İqor Ponomaryovun komandası sonda meydandan qalib ayrılıb. Hesabı 15-ci dəqiqədə "Qarabağ"ın ukraynalı legioneri Denis Sakalovski açıb. Görüşün son 15 dəqiqəsində tərəflər hərəyə bir dəfə fərqləniblər- 2:1. Qələbə sayəsində "Qarabağ" birinci pilləyə yüksəlib. Eyni hesab daha iki matçda qeydə alınıb. Belə getsə, "Ədliyyə" növbəti mövsümə də güclülər dəstəsində başlayacaq. "Təhlükəli zona"da qərarlaşan komanda dünən "Gəncə"yə məğlubiyyət acısı daddırıb. Qazaxda yerli "Göyəzən" "Gənclərbirliyi"nə qalib gəlib. "MKT-Araz" da xal ehtiyatını artırıb. İmişli klubunun növbəti "qurbanı" "Şəmkir" olub (2:0). Bu gün tura yekun vurulacaq. Mərkəzi görüş Tofiq Bəhramov adına Respublika stadionunda keçiriləcək. Qızıl medallara əsas namizədlər - "Neftçi"ylə "Xəzər-Lənkəran" komandaları qarşılaşacaq. Yarışın mükafatları baxımından xüsusi əhəmiyyət kəsb edən "Neftçi"-"Xəzər-Lənkəran" oyunu futbol həvəskarları arasında da böyük maraq doğurur. Azarkeşlər bu gün maraqlı oyun izləməklə yanaşı müxtəlif prizlər də uda bilərlər. Uduşa çıxarılan prizlər matçdan sonra sahiblərini tapacaq. Ordu stadionunda MOİK "Bakı"nı sınağa çəkəcək. "Hərbçilər"ə bu oyunda qələbə çox vacibdir. Yüksək dəstədə yerini qorumaq üçün MOİK mütləq qələbə qazanmalıdır. Paytaxtda "Bakılı"-"Karvan" görüşü də keçiriləcək. Oyunlar saat 18-də başlanacaq. "Şəfa" çempionatda çıxışını dayandırdığından "İnter"ə texniki qələbə verilib.