"Qarabağ" yoxlama görüşündə qələbə qazandı (525-Cİ QƏZET, 26.11.2005)

Bu gün ölkə çempionatının onuncu turu çərçivəsində səfərdə MOİK-lə qarşılaşacaq "Qarabağ" məşqlərini sona çatdırıb. Srağagün isə "Qarabağ" yoldaşalıq görüşü keçirməyə qərar verib. Ağdamlıların rəqibi afrikalı futbolçulardan ibarət komanda olub. Oyun Buzovna qəsəbə stadionunda baş tutub. "Qarabağ"ın baş məşqçisi Elxan Abdullayev yoldaşlıq matçında bütün futbolçulara oynamaq imkanı verib. Meydanın vəziyyəti ideal olmasa da "Qarabağ" məzmunlu oyun sərgiləyə bilib. Ümumiyyətlə qeyd etməliyik ki, oyun əsasən meydanın afrikalı futbolçulara aid hissəsində gedib. Matça fəal başlayan "Qarabağ" birinci hissənin ortalarında hesabı açıb. Sergey Kravçenko Samir Musayevin ötürməsini qapıya yönəldib. Birinci hissə ağdamlıların minimal fərqli üstünlüyü ilə başa çatıb. Fasilədən sonra Elxan Abdullayev "Qarabağ"ın heyətini demək olar ki, tamamilə dəyişərək əsasən gənclərə şans verib. Buna baxmayaraq, onlar da etimadı doğruldaraq yaxşı oyun sərgiləyiblər. İkinci hissədə hesab dəyişməsə də üstünlük yenə Abdullayevin yetirmələrinin tərəfində olub.